भगवान बचाउनुपर्ने अवस्थामा ललितपुर, सांसद खरेलको चिन्ता

नयाँ विकल्प
प्रकाशित मिती: २०८३ जेष्ठ ५, १२: ४४

काठमाडौँ । राष्ट्रिय स्वतन्त्र पार्टी (रास्वपा) का सांसद जगदीश खरेल ले ललितपुरका ऐतिहासिक सम्पदा, प्राचीन मूर्ति र परम्परागत हिटीहरू संरक्षण गर्न तत्काल ध्यान दिन सरकारसँग आग्रह गरेका छन् ।

मंगलबार प्रतिनिधिसभा बैठकमा बोल्दै उनले सम्पदा र सभ्यताको धनी सहर ललितपुरमा अहिले भगवानकै रक्षा गर्नुपर्ने विडम्बनापूर्ण अवस्था सिर्जना भएको बताएका हुन् ।

सांसद खरेलले प्राचीन मूर्तिहरू चोरी हुने, ऐतिहासिक हिटीहरू हराउँदै जाने तथा सम्पदा क्षेत्रमा अतिक्रमण बढ्दै गएको भन्दै गम्भीर चिन्ता व्यक्त गरे ।

उनले भने, “भनिन्छ, भगवानले हाम्रो रक्षा गर्छन् । तर मेरो नगरमा अब ‘भगवानको रक्षा गरिदिनुस्’ भन्नुपर्ने अवस्था आएको छ । मूर्तिहरू चोरी भएका छन्, हिटीहरू हराएका छन् । कतै उत्खनन गर्नुपर्ने आवश्यकता छ भने कतै अतिक्रमण बढ्दो छ ।”

उनले ललितपुरका ऐतिहासिक सम्पदा संरक्षणका लागि राज्यले प्रभावकारी योजना ल्याउनुपर्ने आवश्यकता पनि औंल्याए ।