सुशासन र आर्थिक समृद्धिमा सरकार केन्द्रित : प्रधानमन्त्री वालेन्द्र शाह – Naya Bikalpa
November 22, 2026, Sunday      Epaper

सुशासन र आर्थिक समृद्धिमा सरकार केन्द्रित : प्रधानमन्त्री वालेन्द्र शाह

काठमाडौँ । प्रधानमन्त्री वालेन्द्र शाहले नेपाली नागरिकको दैनिक जीवनस्तरमा वास्तविक सुधार ल्याउने दिशामा आफ्नो नेतृत्वको सरकार प्रतिबद्ध रहेको बताएका छन् ।

प्रधानमन्त्री तथा मन्त्रिपरिषद्को कार्यालयमा मंगलबार काठमाडौँ र नयाँदिल्लीस्थित युरोपेली सङ्घ तथा सदस्य राष्ट्रका राजदूतहरू तथा काठमाडौँस्थित अन्य देशका राजदूतहरूसँग भएको संयुक्त भेटवार्तामा उनले वर्तमान परिस्थितिको गम्भीरता र सरकारलाई प्राप्त जिम्मेवारीप्रति आफू पूर्ण रूपमा सचेत रहेको बताए ।

प्रधानमन्त्री शाहका प्रेस तथा अनुसन्धान विज्ञ दिपा दाहालका अनुसार भेटका क्रममा प्रधानमन्त्रीले हालै सम्पन्न निर्वाचनले सुशासन र समावेशी आर्थिक समृद्धिका पक्षमा स्पष्ट जनादेश दिएको उल्लेख गरे । उनले सरकार परिवर्तन भए पनि नीतिगत निरन्तरता कायम रहने स्पष्ट पार्दै नेपालको नीति स्थिर, स्पष्ट र अनुमानयोग्य रहने बताए ।

“नयाँ हुनु भनेको विगतसँग पूर्ण रूपमा अलग हुनु होइन,” प्रधानमन्त्री शाहको भनाइ उद्धृत गर्दै दाहालले बताइन् । लोकतान्त्रिक मूल्य–मान्यता संरक्षण तथा राजनीतिक स्थिरता कायम गर्न सरकार दृढ रहेको पनि उनले बताए ।

प्रधानमन्त्री शाहले सुशासन, समावेशी आर्थिक वृद्धि र जनमुखी नीतिमार्फत नागरिकका लागि नयाँ अवसर सिर्जना गर्न सरकार केन्द्रित रहेको उल्लेख गरे । उनले लगानी प्रक्रिया थप सहज बनाउने, नवप्रवर्तनलाई प्रोत्साहन गर्ने तथा दिगो विकासका लक्ष्य हासिल गर्न सरकार प्रतिबद्ध रहेको बताए ।

विदेश नीतिका विषयमा उनले नेपालले सन्तुलित र व्यावहारिक नीति अवलम्बन गर्दै छिमेकी मुलुक, विकास साझेदार र मित्र राष्ट्रसँग आपसी सम्मान, सार्वभौम समानता र साझा समृद्धिका आधारमा सम्बन्ध अघि बढाउने स्पष्ट पारे ।

नेपालको विकास र समृद्धिमा सहयोग पुर्‍याएकोमा विकास साझेदार तथा मित्र राष्ट्रहरूप्रति आभार व्यक्त गर्दै प्रधानमन्त्री शाहले व्यापार, लगानी, हरित ऊर्जा, जलवायु परिवर्तन र पर्यटन क्षेत्रमा सहकार्य विस्तार गर्न नेपाल तयार रहेको बताए ।

विश्वका विभिन्न क्षेत्रमा जारी द्वन्द्वप्रति चिन्ता व्यक्त गर्दै उनले शान्ति स्थापनाका लागि सैन्य भिडन्तभन्दा संवाद, कूटनीति र अन्तर्राष्ट्रिय कानुनलाई प्राथमिकता दिनुपर्नेमा जोड दिए ।

भेटका क्रममा युरोपेली सङ्घ तथा अन्य देशका राजदूतहरूले शान्तिपूर्ण रूपमा निर्वाचन सम्पन्न गरेकोमा नेपालको प्रशंसा गरेका थिए । उनीहरूले सुशासन, आर्थिक विकास र समृद्धिको एजेन्डासहित सरकारको नेतृत्व सम्हालेकोमा प्रधानमन्त्री शाहलाई बधाई दिँदै विभिन्न क्षेत्रमा नेपालसँग सहकार्य र लगानी विस्तार गर्न इच्छुक रहेको बताएका थिए ।

सम्बन्धित समाचार

कस्तो रहला आजको मौसम ?
कस्तो रहला आजको मौसम ?
  • २०८३ जेष्ठ १२, १८: १३

काठमाडौं : हाल नेपालको पश्चिमी भू–भागमा पश्चिमी वायुको तथा पूर्वी भू–भागमा भारतको ओडिसा आसपास अवस्थित न्यून चापीय प्रणालीको आंशिक प्रभाव...

आजका लागि विदेशी मुद्राको विनिमयदर
आजका लागि विदेशी मुद्राको विनिमयदर
  • २०८३ जेष्ठ १२, १८: १३

काठमाडौं : नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ। राष्ट्र बैंकका अनुसार अमेरिकी डलर एकको खरिददर...

प्रधानमन्त्री शाह आज भारतको दुईदिने राजकीय भ्रमणमा जाँदै
प्रधानमन्त्री शाह आज भारतको दुईदिने राजकीय भ्रमणमा जाँदै
  • २०८३ जेष्ठ १२, १८: १३

काठमाडौं । प्रधानमन्त्री बालेन्द्र शाह आज भारतको दुईदिने राजकीय भ्रमणमा जाँदैछन् । भारतीय प्रधानमन्त्री नरेन्द्र मोदीको मैत्रीपूर्ण निमन्त्रणामा प्रधानमन्त्री शाह...