आज आउँदै आगामी आर्थिक वर्षको बजेट, २२ खर्बसम्मको आकार हुने अनुमान – Naya Bikalpa
November 22, 2026, Sunday      Epaper

आज आउँदै आगामी आर्थिक वर्षको बजेट, २२ खर्बसम्मको आकार हुने अनुमान

काठमाडौं ।  अर्थमन्त्री डा. स्वर्णिम वाग्ले आज अपराह्न ४ बजे संघीय संसद्को संयुक्त बैठकमा आगामी आर्थिक वर्ष २०८३/८४ को बजेट प्रस्तुत गर्दैछन् । राष्ट्रिय स्वतन्त्र पार्टी (रास्वपा) नेतृत्वको सरकारले ल्याउन लागेको यो पहिलो बजेट भएकाले यसप्रति विशेष चासो बढेको छ ।

सरकारले रास्वपाको ‘वाचापत्र’लाई मुख्य आधार बनाएर बजेट तयार पारेको जनाएको छ । राष्ट्रिय स्रोत अनुमान समितिले तय गरेको १८ खर्ब ९० अर्ब रुपैयाँको प्रारम्भिक सीमा नाघेर सरकारले करिब २१ देखि २२ खर्ब रुपैयाँसम्मको बजेट ल्याउने तयारी गरेको बताइएको छ ।

चालु आर्थिक वर्षमा अपेक्षाअनुसार राजस्व संकलन हुन नसकेको र करिब डेढ खर्ब रुपैयाँ घाटा रहेको अवस्थामासमेत सरकारले जनआकांक्षा सम्बोधन गर्ने लक्ष्यसहित महत्वाकांक्षी बजेट ल्याउन लागेको हो ।

बजेटमा आगामी ७ वर्षभित्र नेपालको अर्थतन्त्रलाई १०० अर्ब अमेरिकी डलर बराबर पुर्‍याउने तथा १० वर्षभित्र नेपाललाई मध्यम आय भएको मुलुक बनाउने दीर्घकालीन लक्ष्य समेटिने जनाइएको छ ।

यसपटकको बजेटमा सुशासन, डिजिटल नेपाल, सूचना प्रविधि र कनेक्टिभिटीलाई विशेष प्राथमिकता दिइने भएको छ । सूचना प्रविधिलाई ‘राष्ट्रिय रणनीतिक उद्योग’ घोषणा गर्दै स्टार्टअप व्यवसायका लागि बीउ पूँजी उपलब्ध गराउने तथा युवालाई लक्षित ‘रिमोट वर्क’ कार्यक्रम सञ्चालन गर्ने तयारी गरिएको छ ।

त्यस्तै, बन्द अवस्थामा रहेका उद्योग पुनः सञ्चालन गर्ने, सरकारी सेवामा ‘लाइन होइन, अनलाइन’ अवधारणा लागू गर्ने तथा प्रशासनिक सुधारलाई पनि प्राथमिकतामा राखिएको छ । सरकारले निजामती कर्मचारीको तलब २७ देखि ५६ प्रतिशतसम्म वृद्धि गर्ने र कर्मचारी संयन्त्रको दलीयकरण अन्त्य गर्न ट्रेड युनियन खारेज गर्ने जस्ता नीतिगत व्यवस्था ल्याउन सक्ने चर्चा छ ।

पूर्वाधार विकासका लागि निजी क्षेत्रको सहभागिता बढाउने नीति पनि बजेटमा समेटिने भएको छ । सुरुङमार्गलगायत ठूला आयोजनामा निजी लगानी आकर्षित गर्ने सरकारको तयारी रहेको बताइएको छ ।

यद्यपि सीमित स्रोत, न्यून राजस्व संकलन तथा आन्तरिक र बाह्य ऋणको दबाबबीच सरकारले आर्थिक पुनर्संरचना र विकासलाई केन्द्रमा राखेर बजेट ल्याउने अपेक्षा गरिएको छ ।

सम्बन्धित समाचार

कस्तो रहला आजको मौसम ?
कस्तो रहला आजको मौसम ?
  • २०८३ जेष्ठ १५, ०९: १६

काठमाडौं : हाल नेपालको पश्चिमी भू–भागमा पश्चिमी वायुको तथा पूर्वी भू–भागमा भारतको ओडिसा आसपास अवस्थित न्यून चापीय प्रणालीको आंशिक प्रभाव...

आजका लागि विदेशी मुद्राको विनिमयदर
आजका लागि विदेशी मुद्राको विनिमयदर
  • २०८३ जेष्ठ १५, ०९: १६

काठमाडौं : नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ। राष्ट्र बैंकका अनुसार अमेरिकी डलर एकको खरिददर...

प्रधानमन्त्री शाह आज भारतको दुईदिने राजकीय भ्रमणमा जाँदै
प्रधानमन्त्री शाह आज भारतको दुईदिने राजकीय भ्रमणमा जाँदै
  • २०८३ जेष्ठ १५, ०९: १६

काठमाडौं । प्रधानमन्त्री बालेन्द्र शाह आज भारतको दुईदिने राजकीय भ्रमणमा जाँदैछन् । भारतीय प्रधानमन्त्री नरेन्द्र मोदीको मैत्रीपूर्ण निमन्त्रणामा प्रधानमन्त्री शाह...