भारततर्फ तस्करी हुँदै गरेको ६५ सय बोरा केराउ सहित म्यानेजर श्रेष्ठ प्रहरीको नियन्त्रणमा

नयाँ विकल्प
काठमाडौं– प्रदेश २ प्रहरीले नेपालबाट भारततर्फ तस्करी गर्न तयारी अवस्थामा राखेको छ हजार पाँच सय सय बोरामा राखिएकाे तीन सय क्विन्टल हरियो केराउ नियन्त्रणमा लिएको छ ।

प्रदेश २ प्रहरी कार्यालयले विशेष सूचनाका आधारमा प्रिज्मा एग्रो कमोडिटिज ट्रेडिङ प्रालीले भारततर्फ तस्करीकालागि तयारी अवस्थामा राखेको यतिकाे परिणामको केराउ बरामद गरेको हो ।
प्रहरीले प्रिज्मा एग्रो कमोडिटिज ट्रेडिङ प्रालिका म्यानेजर प्रभात श्रेष्ठलाइ पनि पक्राउ गरेकाे छ ।

बरामद भएकाे केराउ ललितपुरका ब्यापारी वेदान्तजंग राणाकाे हाे । नेपाल– भारत नाका नजिकै बाराकाे इनरवाबाट प्रहरीले साे ठूलाे परिणामकाे केराउ बरामद गरेकाे हाे ।

तस्करी हुन लागेको सो हरियो केराउको बजार मुल्य दुई करोड ६० लाख माथी पर्छ । नेपाल भारत सीमा नाका नजिकै इनारवा गाउँको एक गोदाममा भारततर्फ तस्करीकालागि लुकाएर राखेको अवस्थामा प्रहरीले केराउ बरामद गरेको दाबी गरिएकाे छ ।

प्रदेश २ प्रहरी प्रमुख प्रहरी नायव महानिरीक्षक ( डिआईजी ) धिरजप्रताप सिंहले नेपालबाट भारततर्फ तस्करी हुन लागेको सूचनाका आधारमा उक्त ठूलो परिणामको हरियो केराउ बरामद भएको जानकारी दिए ।

प्रदेश २ अन्तर्गतका ८ बटा जिल्लामा प्रहरीले तस्करी तथा अवैध क्रियाकलप विरुद्ध कडा निगरानी गरेको छ । नेपाल – भारत नाका अन्तर्गतको विरगंज लगायतका नाकाबाट हुने तस्करी पछिल्लो समयमा कमि आएको प्रहरीकाे दाबी छ ।

केराउ तस्करीकालागि राणाले प्रयोग गरेको ना ६ त ८७१० नम्बरको ट्याक्टर समेत नियन्त्रणमा लिइएको छ । प्रदेश २ प्रहरीमा डिआइजी सिंहले कमाण्ड सम्हालेसंगै मातहतको प्रहरीले गैरकानुनी क्रियाकलापविरुद्ध कडा निगरानी सुरु गरेको छ ।