हो– हल्ला र तोडफोडबीच प्रदेश ५ को नाम र राजधानीकाे प्रस्ताव प्रदेशसभा बैठकमा

नयाँ विकल्प,

काठमआडौ– प्रदेश ५ को राजधानी र नामको प्रस्ताव प्रदेशका अर्थ, आन्तरिक मामिला तथा कानून मन्त्री कुलप्रसाद केसीले पेश गर्नुअघि र पछि तथा छलफल हुँदा सभामा तोडफोड र हो हल्ला भएको छ ।

सोमबार बसेको प्रदेशसभाको बैठकमा मन्त्री केसीले प्रस्ताव टेवुल गर्नुअघि सभामुखको वेल घेरा हालेका प्रमुख प्रतिपक्ष नेपाली कांग्रेसका साँंसदहरुले प्रस्ताव टेबुल भएपछि कुर्सी र माईक तोडफोड गरेका थिए ।

कांग्रेसका प्रदेश सभासदहरुले प्रदेशसभाका आधा दर्जन कुर्र्सी तोडफोड गरेका छन् । उनीहरुले मन्त्रीलाई रोष्टममा जानबाट रोक्ने प्रयास गरेका थिए । प्रदेश ५ को नाम लुम्बिनी र राजधानी दाङको भालुवाङ कायम गर्ने प्रस्तावमा छलफलमा नेकपाकै सभासद्ले असहमति जनाए ।

प्रस्ताव पेश गरे लगतै नेकपाका असन्तुष्ट साँंसद भोजप्रसाद श्रेष्ठले हो हल्ला र कोलाहलका बीच सदन संचालनको विधि उपयुक्त नभएको, राजधानी तोक्ने बिषयमा लोकतान्त्रिक पद्धतिबाट नआएको भन्दै गुनासो गरेका थिए ।

श्रेष्ठले राजधानी तोक्न गठन भएको बिशेष समितिको प्रतिवेदन सांसदको हातमा नभएकोले सदन समक्ष पेश गर्न माग गरेका थिए । असन्तुष्ट साँंसद श्रेष्ठले बारम्बर थप समयको माग गरेपनि सभामुख पूर्णबहादुर घर्तीले समय दिएनन् ।

कांग्रेसकी सांसद तारा जिसीले रुपन्देहीमा गरिएको प्रदर्शन संघीयताका टेलर मात्र भएको भन्दै वास्तविक तस्वीर अझै आउन बाँकी रहेको चेतावनी दिइन् । उनले सत्तारुढ दलका सांसदलाई समेत झुक्याएर राजधानीको नाम माथिबाट लादिएको आरोप लगाइन् ।

सदनको कारबाही चलाईरहँदा सभामूख घर्तीको सामुन्नेमा दुइ जना मर्यादापालकले छेकेका थिए । कुर्सी, माईक र टेबल तोडफोड हुन थालेपछि सभामुखले मर्यादापालकलाई तोकफोड रोक्न रोष्टमबाटै निर्देशन दिएका थिए ।

राजधानीको नाम टेबल गर्न रोष्टमतर्फ गएका प्रदेश मन्त्री केसीको कागजात विपक्षी सांसदले खोसेका थिए । तरपछि मर्यादापालकले सांसदहरुलाई ठेलम ठेल गरी खुम्चिएको र च्यातिएको कागजात धुतेर लिएका थिए ।

मर्यादापालकको धक्का धक्की तथा ठेलम ठेलबाट निस्सासिएका विपक्षी सांसदहरुले आक्रोसित भएर टेबुल, कुर्सी र माईक तोडफोड गरेका थिए ।