भारतीय गुप्तर संस्था ‘रअ’ का प्रमुख नेपालमा

नयाँ विकल्प,

काठमाडौं –भारतीय गुप्तचर संस्था ‘रअ’ (रिसर्च एनालाईसिस विंग्स) का प्रमुख सामन्तकुमार गोयल बुधबार दिउँसो चार्टर्ड विमानमार्फत काठमाडौं आएका छन् ।

चार्टर्ड विमानमा बुधबार दिउँसो काठमाडौं उत्रिएका उनी आजै राति ९ बजे नै नयाँदिल्ली फर्किने भएका छन् । उच्च सरकारी स्रोतका अनुसार उनले प्रधानमन्त्री केपी शर्मा ओलीसहितका केही उच्च सरकारी अधिकारीलाई भेट्ने कार्यक्रम छ ।

नेपालस्थित सरकारी अधिकारीहरुले उनको भ्रमणलाई अनौपचारिक भनेका छन् । रअ प्रमुखको नेपाल भ्रमण औपचारिक नभएको र यसबारे आधिकारिक जानकारी पनि नभएको परराष्ट्र मन्त्रालय स्रोतले जनायो ।

नेपालसँग चर्किएको सीमा विवादपछिको तनाव र कोरोना संकटका कारण रोकिएको भारतीय स्थल सेनाध्यक्ष जनरल मनोज मुकुन्द नरावणेको नेपाल भ्रमणको पूर्वसन्ध्यामा गोयल नेपाल आउनुलाई महत्वका साथ हेरिएको छ ।

सैनिक जनसम्पर्क निर्देशनालयले जनरल नरावणे यही कात्तिक १८ गते नेपाल भ्रमणमा आउने जनाइसकेको छ ।

कोरोना संकटका कारण दुवै देशमा भएको लकडाउनका कारण स्थगित भारतका स्थल सेनाध्यक्ष जनरल नरावणे नेपाल आउन लागेका हुन् । उनी नेपाल आएपछि नेपाली सेनाको मानार्थ प्रधानसेनापतिको मान्यता दिने औपचारिका कार्यक्रम गर्न नेपाल सरकार मन्त्रिपरिषद्ले २०७६ माघ २० गते नेपाली सनोलाई अनुमति दिइसकेको छ ।