बिप्लवका सैन्य कमान्डर शेर्पा हतियारसहित पक्राउ

नयाँ विकल्प
प्रकाशित मिती: २०७७ मंसिर ७, १२: ३९

नयाँ विकल्प

काठमाडाैं- नेत्रविक्रम चन्द (बिप्लव) नेकपाका एक जना सैन्य लडाकु पक्राउ परेका छन । प्रहरीले मोरङको उर्लाबारीबाट हतियारसहित ताप्लेजुङको फक्ताङलुङ्ग गाउँपालिका–२ घर भएका ३२ वर्षीय पेम्बा साङ्गे शेर्पालाई पक्राउ गरेको हो

विशेष सूचनाका आधारमा शेर्पालाई उर्लाबारी नगरपालिका– ६ तरुण चोकस्थित राधिका माध्यमिक विद्यालय नजिकबाट शनिबार साँझ पक्राउ गरिएको मोरङ प्रहरी प्रमुख (एसपी) सन्तोष खड्काले बताए । पक्राउ गरेर हिरासतमा लिइएका शेर्पा विप्लव समूहको ४ नम्बर कम्पनीका सेक्सन कमान्डर भएको खुलेको उनले जनाएका छन ।

शेर्पाले मोरङको मिक्लाजुङ गाउँपालिका क्षेत्रमा बसेर लामो समयदेखि विप्लव समूहको गतिविधी सञ्चालन गरिरहेको प्रहरीले बताएको छ । पक्राउ परेका शेर्पाको साथबाट एउटा पेस्तोल, म्यागजिन र तीन राउण्ड गोली समेत बरामद गरेको छ ।

शेर्पाको साथबाट पार्टीको पर्चा र पम्प्लेट तथा अन्य दस्तावेजहरु पनि बरामद भएको मोरङ प्रहरीले जनाएको छ । पक्राउ परेका शेर्पा, विप्लव समूहको सैन्य लडाकु र सेक्सन कमान्डर रहेको समेत प्रहरीको अनुसन्धानबाट खुलेको प्रहरीले जनाएको छ । शेर्पाविरुद्ध प्रहरीले हातहतियार खरखजना मुद्दामा म्याद थपगरी थप अनुसन्धान बढाईने प्रहरीले जनाएको छ ।