बिराटनगरका संस्थापक मेयर तथा कांग्रेस नेता असोक कोइरालाको निधन

नयाँ बिकल्प,

काठमाडौं – नेपाली कांग्रेस जिल्ला कार्यसमिति मोरङको १९ वर्षसम्म सभापति भएका बिराटनगर नगरपालिकाका संस्थापक मेयर तथा राष्ट्रिय सभाका पूर्वसासद असोक कोइरालाको बिहीबार बिहान निधन भएको छ ।

नेपालको लोकतान्त्रिक आन्दोलनका एक अथक योद्धा संविधान सभा सदस्य तथा नेपाल विद्याथर्गी संघका संस्थापक कोइरालाको आज बिहीबार विहान १ बजे ७७ वर्षको उमेरमा विराटनगरस्थित न्यूरो अस्पतालमा उपचारका क्रममा निधन भएको हो ।

स्वास्थ्यमा समस्या भएपछि मंगलबार न्यूरो अस्पतालमा भर्ना भएका कोइरालालाई निमोनिया भएको र स्वासप्रस्वासमा समस्या भएको भन्दै चिकित्सकले बुधबार भेण्टिलेटरमा राखेर उपचार गरेका थिए ।

पूर्वप्रधानमन्त्री तथा कांग्रेसका पूर्वसभापति शुशिल कोइरालाका सहोदर भाई असोक पूर्वप्रधानमन्त्री गिरिजाप्रसाद कोइरालाका विश्वास पात्र समेत थिए ।

कोइरालाले प्रजातान्त्रिक आन्दोलनहरुमा सक्रिय रहँदा ७ वर्ष जेल जीवन बिताएका थिए । कांग्रेसको विभिन्न तहमा रहेर संगठन निर्माण गर्न र लोकतान्त्रिक आन्दोलनमा नेतृत्वदायी भूमिका निर्वाह गरेका अग्रज र निष्ठावान नेतृत्वलाई पार्टीले गुमाएको नेपाली कांग्रेसले जनाएको छ ।

कोइरालाको निधनप्रति दुःख व्यक्त गर्दै पार्टी सभापति शेरबहादुर देउवाले आफ्ना मित्र अशोक कोइरालाको निधनको खबरले निकै मर्माहत भएको जनाएका छन् ।

उनको निधनले नेपाली कांग्रेसले एक असल र निष्ठावान अग्रज व्यक्तित्वसँगै मोरङको भूगोलले एक सरल राजनीतिकर्मी गुमाएको देउवाले जनाएका छन् ।

कांग्रेसका प्रभावशाली नेता डा. शेखर कोइरालाले असोक कोइरालाप्रति भावपूर्ण श्रद्धाञ्जलि अर्पण गर्दै उनले पार्टी र देशका लागि दिएको योगदान सदा अनुकरणीय र स्मरणीय रहेको जनाएका छन् ।

स्वर्गीय कोइरालाको पार्थिव शरिरलाई आज १ देखि २ बजेसम्म कोइरालाको निजी निवास मधुमारामा राखिने भएको छ । त्यसपछि आजै विराटनगरको हाटखोलास्थित विश्रन्ति घाटमा अन्त्येष्टि गरिने पत्रकार शेखर रेग्मीले जनाए ।