बागलुङ बसपार्क मुख्यमन्त्रीले उद्दघाटन गरेको भोलिपल्टै सुनसान

नयाँ विकल्प
प्रकाशित मिती: २०८१ भाद्र २०, १३: ३३

बागलुङ। गण्डकी प्रदेशका मुख्यमन्त्री सुरेन्द्रराज पाण्डेले एक भव्य कार्यक्रमकाबीच उद्घाटन गरेको बागलुङ बसपार्क २४ घण्टा नबित्दै सुनसान भएको छ।

बाटोको दूरावस्था र सवारीसाधनको सुरक्षा चुनौती देखाउँदै व्यवसायीले सवारीसाधन बसपार्कमा लैजान आनाकानी गर्दा समस्या देखिएको हो।

गण्डकी प्रदेशका मुख्यमन्त्री पाण्डेले गत मंगलबार चालक र सहचालकलाई टीका लगाई बसपार्कको शुभारम्भ गरेका थिए।

बागलुङ नगरपालिका–४ दावगह्मा २३ वर्षपछि आधुनिक बागलुङ बसपार्क सञ्चालनमा आएको थियो। व्यवसायी विष्णुराज पन्तले असुरक्षाका कारण व्यवसायीले बसपार्कमा बस राख्न नसकेको बताए।

‘बस ठोकिन्छ, कसरी त्यहाँ बस जान्छ र खै?’, उनले आश्चार्य व्यक्त गर्दै भने, ‘नगरले सुरक्षा दिनुप¥यो नी, अनि मात्र ठूला सवारी गन्तव्यमा पुग्छन्।’

बसपार्क सञ्चालनमा ल्याएको नगरले भने व्यवसायीसँग सम्झौताको काम बाँकी रहेकाले केही दिन लाग्ने जनाएको छ।

निर्माण प्रक्रिया सुरुआत गरेको २३ वर्षपछि बागलुङ बसपार्क सञ्चालनमा ल्याइएको थियो । बसपार्क निर्माणका लागि नगर विकास कोषबाट आठ करोड ७० लाख ऋण लिइएको थियो । बसपार्कमा ८० ठूला बस, १० माइक्रोबस एकैसाथ राख्न सकिन्छ।