जुम्लाय् २० द्वः न्यासः व ११ मेट्रिक टन स्याउ सल

नयाँ विकल्प संवाददाता
प्रकाशित मिती: २०८१ कार्तिक १६, १८: ३२

जुम्ला : थ्व दँय् जिल्लाय् २० द्वः न्यासः व ११ गू मेट्रिक टन स्याउ सगु दु । कृषि विकास ज्याकुथिं पितब्यूगु तथ्याङ्क कथं पीनिसः व ५० हेक्टरय् पिनातःगु स्याउमा पाखें २० द्वः न्यासः व ११ गू मेट्रिक टन (४६ क्विन्टल) स्याउ उत्पादन जूगु खः ।

थनया च्यागू हे स्थानीय तहया स्याउमियाः ६१ क्वति ४१ लख ध्यबा जिल्लाय् दुत हयेफूगु खँ ज्याकूया प्रमुख बालकराम देवकोटां कनादिल । थुकिमध्ये ग्वी स्वसः व ९१ मेट्रिक टन स्याउ जिल्लां पिने निर्यात जूगु खः ।

ट्रक, बस, जिपनापं हाइस व जहाजं तकं नं स्याउ निर्यात जूगु खं ज्याकूया प्रमुख देवकोटां कसें धयादिल, “बसं झिंखुसः व ६० मेट्रिक टन, जिप व हाइसं खुसः व ६४ मेट्रिक टन व जहाजं ७४ मेट्रिक टन स्याउ निर्यात जूगु खः ।”

अथे हे मालवाहक ट्रकपाखें ख्वीइगुसः व ९३ मेट्रिक टन स्याउ निर्यात जूगु दु । च्यासः व ३७ म्ह स्याउबन्जातय्सं किसानतय्गु स्याउ बजारय् यंकूगु दु । जुम्लाया किसानतय्सं छगू केजी स्याउ थ्यंमथ्यं रु ६० कयाः मिउगु खँ ज्याकुथिया प्रमुख देवकोटां कनादिल ।