नेपाल संवतं राष्ट्रिय छवाः बल्लाकेत ग्वाहालि जुइ : राष्ट्रपति

नयाँ विकल्प संवाददाता
प्रकाशित मिती: २०८१ कार्तिक १७, १७: ०१

येँ, १ कछलाथ्व : राष्ट्रपति रामचन्द्र पौडेलं ‘नेपाल संवत् ११४५’ शुरु जूगु लसताय् देय् दुने व विदेशय् च्वनाच्वंपिं सकल नेपाःमि तताकेहेँ व दाजुकिजापिंत सुख, शान्ति व समृद्धिया लागि भिन्तुना देछाना दिइगु दु ।

थौं छगू भिन्तुना सन्देश पितबिसें वय्कलं नेपाल संवतं दक्व नेपाःमितय् दथुइ सद्भाव‚ सहिष्णुता व बन्धुत्वया भावना जायाः राष्ट्रिय छवाः जुइत ग्वाहालि जुइगु भलसा कयादिइगु दु ।

अथेहे, राष्ट्रिय विभूति साख्वाःया उगु लोक कल्याणकारी व परोपकारी ज्यायात लुमंकुसें थौं निस्वार्थ भावं समाजया उन्नति व प्रगतिया निंतिं न्ह्यज्यावनेत झीपिं फुक्कसित प्रेरणा दइगु विश्वास नं वय्कलं प्वकाःदिल । “लिच्छवी जुजु राघवदेवया पालय् येँ गालय् च्वंपिं किसान व गरीब जनतातय्त त्यासां मुक्त यानाः शङ्खधर साख्वालं थुगु संवत्यात छ्यलाबुलाय् हःगु खः, नेपाःया समाज सभ्य व सहिष्णु समाज खः, झीगु नखःचखः व थज्याःगु भिंगु परम्परातय्सं थुकियात अझ बांलाका यंकाःच्वंगु दु”, सन्देशय् वय्कलं न्ह्यथनादीगु दु ।

राष्ट्रिय विभूति साख्वालं प्रवर्तन याःगु नेपाल संवत् चन्द्रमासया लिधंसाय् दयेकीगु झीगु थःगु हे मौलिक राष्ट्रिय संवत् खः । थुगु संवत्या न्हापांगु न्हि कात्तिक शुक्लपक्ष प्रतिपदापाखें शुरु जुइ । थुगु दिंयात नेपाल संवतया न्हूदँया कथं येँँ, यल, ख्वप, भ्वँत, धौख्यः, बाह्रबिसे व द्वाल्खा आदि नेवाः समुदाय अप्वःदुगु थासय् विशेष नखःया कथं हनेगु याइ ।