मनू मीगु व ल्हयेगु नियन्त्रणय् हयेत सरकार सक्रिय

नयाँ विकल्प संवाददाता
प्रकाशित मिती: २०८१ कार्तिक १९, १४: १७

येँ, ३ कछलाथ्व : नेपाः सरकारं मनू मीगु व ल्हयेगु ज्या नियन्त्रणय् हयेगुया निंतिं सक्रिय जूगु दु । मिसा, मस्त व ज्याथःपिं नागरिक मन्त्रालयं लिपांगु ई मनू मीगु व ल्हयेगुली पीडित÷प्रभावित जूपिं ७७ म्ह मिसा देशय् लित हःगु, छेँजःपिंलिसे पुनर्मिलन व पुनःस्थापना जूगु खँ न्ह्यथःगु दु । अथेहे, मनू मीगु (नियन्त्रण) ऐन, २०६४ संशोधन विधेयकया मस्यौदा मन्त्रिपरिषद्य लःल्हाःगु छ्याञ्जे दिनेश भट्टराईं न्ह्यब्वयादीगु दु । मन्त्रालयं मनू मीगु ज्याया विरुद्धय् राष्ट्रिय नीति, २०८१ या मस्यौदातकं दयेकेधुंकूगु दु ।

मनू मीगु व ल्हयेगुलीं पीडित÷प्रभावित मिसा व मस्तय्गु उद्धार, संरक्षण, पुनःस्थापना, पारिवारिक पुनर्मिलन व केन्द्र व्यवस्थापनया लागि सिन्धुपाल्चोक, येँ व सुर्खेतय् चलेजुयाच्वंगु स्वंगू पुनःस्थापना केन्द्रयात सञ्चालन व व्यवस्थापन खर्च शोधभर्ना भुक्तानी तकं जूगु खँ न्ह्यथनादिल । आर्थिक दँ २०७१÷०७२ निसें चले जूगु थुगु केन्द्रपाखें सच्छि व ४८ म्हसिनं सेवा काये धुंकूगु व थुगु आवय् १८ म्ह मिसा व किशोरीतय्त सुरक्षित कथं पुनःस्थापना केन्द्रं सेवा ब्यूगु खँ छ्याञ्जे भट्टराईं न्ह्यब्वयादिल ।

नेपालं मनू मीगुयात तःधंगु अपराधया कथं भापियातःगु दु । थ्वसम्बन्धी नेपाःया आःया कानुन ‘मनू बेचबिखन व ल्हयेगु (नियन्त्रण) ऐन, २०६४’ नं मनू मीगु व ल्हयेगुयात स्पष्ट परिभाषित याःगु दु । मन्त्रालयं मनू बेचबिखन व ल्हयेगु (नियन्त्रण) ऐन, २०६४ लिसें वैदेशिक रोजगार ऐन २०६४, अध्यागमन ऐन २०४९, मचा श्रम (निषेध व नियन्त्रण) ऐन २०५६, श्रम ऐन २०७४, कानुनी सहायता ऐन २०५४ व पारस्परिक कानुनी सहायता ऐन २०१४ या प्रभावकारी छ्याबुलाय् बः बियाःच्वंगु छ्याञ्जे भट्टराईया धापू दु ।

अथेहे मनू मीगुलिसे स्वापू दूगु राहदानी ऐन २०७४, संगठित अपराध निवारण ऐन २०७०, मुलुकी अपराध संहिता, २०७४, संगठित अपराध निवारण ऐन २०७०, कसुरजन्य सम्पति व साधन (रोक्का, नियन्त्रण र जफत) ऐन २०७० थेज्याःगु कानुनतकं प्रभावकारी ढंगं छ्याबुलाय् हयेत बः ब्यूगु दु ।

नेपाःया संविधान २०७२ पाखें मनू मीगुयात छगू तःधंगु अपराधकथं म्हसीका बियाः उकिया विरुद्धया प्रावधानयात मौलिक हक व राज्यया नीति अन्तर्गत तयातःगु दु । माइती नेपालया संस्थापक नायः अनुराधा कोइरालां मनू मीगु दिकेत मनू मीगु व ल्हयेगु (नियन्त्रण) ऐन २०६४ यात संशोधन यायेमाःगु खँ कुलादिइगु दु ।