‘चिल्ड्रेन पार्क’ आन्तरिक पर्यटकतय् यःगु थाय्

नयाँ विकल्प संवाददाता
प्रकाशित मिती: २०८१ कार्तिक १९, १९: १३

दमौली : तनहुँया भानु नगरपालिका–१३ सम्जुरय् च्वंगु ‘चिल्ड्रेन पार्क’ आन्तरिक पर्यटकतय् यःगु थाय् जूगु दु । स्थानीय चण्डीमाइ युवा क्लबया सक्रियताय् वंगु दँय् दयेकूगु पार्क आन्तरिक पर्यटकतय् यःगु थाय् जूगु दु ।

क्लबया नायः अर्जुन बानियां थुगु थाय्यात पर्यटकीय थ्यंकेमाःगु थाय् दयेकेत ल्याय्म्हतय्गु सक्रियताय् पार्क दयेकूगु खँ धयादिल । वय्कलं धयादिल, “थुकियात विशेष यानाः टिकटक पार्कया कथं विकास याःगु दु । गामय् पर्यटकीय थाय् दयेकाः आन्तरिक पर्यटक दुकायेगु झीगु मू तातुना खः ।”

बानियाँया कथं थौंकन्हय् न्हिंन्हिं स्वसः स्वयाः अप्वः आन्तरिक पर्यटक थन वयाच्वंगु दु । “मोहनीया इलय् थन रोटेपिङ तःगु खः । थुकिं नं आन्तरिक पर्यटकतय्त साःगु दु । ३० फिट तःधंगु नेपाःया ध्वाँय् ब्वयेकागु दु । विश्राम यायेगु थाय्तकं दयेकागु दु । वाउँगु गुँया किपालं यक्वसित नुगः मुइकी”, धकाः धयादिल ।

लिकुनाःच्वंगु सम्जुर गांया प्रचारप्रसार यायेत थन पार्क दयेकूगु खः । ‘थःगु गां थःम्हेसिनं दयेके’ धैगु अभियानकथं गांया ल्याय्म्ह व विदेशय् च्वंपिं ल्याय्म्हतय्गु लगानीपाखें पार्क निर्माण जूगु खँ नायः बानियां न्ह्यथनादिल । पार्क दयेकेत भानु नपा छेँ जुयाः विदेशय् च्वंपिंत इनाप याःगु व थ्व दयेकेत थन हे दुपिं ल्याय्म्हतय्सं श्रमदान याःगु खः । थ्व थाय्यात अझ आकर्षक दयेकेत मेमेगु पूर्वाधारतकं दयेकेगु क्लबया योजना दूगु खँ धाःगु दु ।