छठया निंतिं कुतिइ वानाः जाकि चुं दयेकल

नयाँ विकल्प संवाददाता
प्रकाशित मिती: २०८१ कार्तिक १९, १९: १६

महोत्तरी : महोत्तरीनापं मिथिलाञ्चल व तराई मधेसय् थौंनिसें छठ पर्वया लागि कुटानी पिसानी न्ह्यागु दु । छठ पर्वय् छ्व व जाकिया थी थी पकवान दयेकाः छायेगु चलन दूगुलिं व हे पकवान दयेकेत थौंनिसें कुटानी पिसानी न्ह्यागु खः ।

तराई मधेसय् गोधन (गोवद्र्धन पूजा) पर्व पूवनेधुंकाः छठ पूजाया लागि कुटानी पिसानी सुरु याइगु परम्परा दु । आइतवाः तराई मधेसय् गोधन पर्व पूवंकाः थौंनिसें छठ पर्वया कुटानी पिसानी सुरु याःगु जलेश्वर नगरपालिका–८ या बर्तालु राजवती देवीं धयादिल ।

छठ पर्वया लागि छेँखापत्तिं थौं सुथय् अरबा जाकि व ल्हुयातःगु छ्व सिलाः पानाः थौंनिसें हे जाकि व छ्वः कुटानी पिसानी यानाः चुं दयेकीगु जलेश्वर–८ या व्रतालु सुमित्रा देवीं धयादिल ।

नी व शुद्धताया नखः कथं छठ व्रतया लागि कुटानी पिसानी याइगु जाकि र छ्व छेँ, फलय् वा टोलय् च्वंगु ढिकी व जाँतोय् ल्हुइगु परम्परा दु । तर आः ढिकी र जाँतो मदूगुलिं गनंगनं मिलय् नं कुटानी पिसानी यानाः हये धुंकूगु जलेश्वर–६ की विनिता देवीं धयादिल ।

सुथन्हापां थःथःगु छेँय् वा टोलय् दूगु ढिकी तथा जाँतोयात नी व सफा लखं सिलाः नी यानाः तिनि छ्वः व जाकि वायेगु व लिपा हाकनं छ्व व जाकियात सिलाः पानाः ल्हुइगु याइ । थथे यानाः दयेकूगु चुं हे छठ पर्वय् सूद्र्य व माता छठदेवीया अघ्र्यया लागि ठेकुवा, भुस्वा, खजुरिया, पेरुकिया आदि पकवान दयेकीगु जलेश्वर–२ या कोसिला देवीं धयादिल ।

छठ पर्वय् जाकि व छ्वया चुंपाखें दयेकूगु ठेकुवा व भुस्वा हे मू प्रसाद जुइगुलिं थुकियत शुद्ध जुइक कुतिइ वानां दयेकीगु याइ ।