१४ दँ क्वय्या मस्तय्त क्यान्सर ल्वय्या सितिकं उपचार

नयाँ विकल्प संवाददाता
प्रकाशित मिती: २०८१ मंसिर ४, १६: ३३

ख्वप : ख्वप क्यान्सर अस्पतालय् १४ दँ क्वय्या मस्तय्त सितिकं क्यान्सर ल्वय्या वासः यायेगु ज्या न्ह्यागु दु । अस्पतालं थ्व मङ्सिर २ गतेनिसें १४ दँ क्वय्या मस्तय्त क्यान्सर ल्वय्या फुक्कं उपचार सितिक्कं न्ह्याकूगु अस्पतालया निमित्त कार्यकारी निर्देशक डा उज्ज्वल चालिसें धयादिल ।

स्वास्थ्य तथा जनसङ्ख्यामन्त्री प्रदीप पौडेलं सरकारी अस्पतालय् १४ दँ क्वय्या मस्तय्त क्यान्सर ल्वय्या उपचार सितिक्कं यायेगु धकाः वंगु कात्तिक ११ गते याःगु मन्त्रीस्तरीय निर्णययात अस्पतालं छ्यलाय् हःगु खः ।

सरकारं सरकारी अस्पतालमध्ये ख्वप क्यान्सर अस्पताल ख्वप, कान्ति बाल अस्पताल येँ व बिपी कोइराला मेमोरियल क्यान्सर अस्पताल चितवनय् थुजाःगु सेवा सितिक्कं याय्गु निर्णय याःगु खः । स्वास्थ्य तथा जनसङ्ख्या मन्त्री पदय् नियुक्त जुयादिइ धुनेखतं पौडेल १४ दँया क्वय्या मस्तय्त क्यान्सरया सितिक्कं उपचारया सेवा बिइगु कुतः न्ह्याकादीगु खः ।

अस्पतालया निर्देशक डा चालिसें धयादिल, “सरकारया नीतिकथं ख्वप क्यान्सर अस्पतालं नेपालय् हे न्हापांखुसिइ वंगु २ गतेनिसें थ्व सेवा सुरु याःगु खः, स्वास्थ्यमन्त्री प्रदीप पौडेलं बुधबाः थुकियागु औपचारिक उलेज्या यायेत्यंगु, आः मस्तय्सं आर्थिक अभावया हुनिं वासः यायेमखना सीमाःगु अवस्था वइमखु, झीगु अस्पतालं मदिक्कं सेवा बिइ ।”

अस्पतालया वरिष्ठ प्रशासकीय प्रमुख राजाराम तजलेजुं क्यान्सर बिरामीया चाप अप्वःया वयाच्वंबले मस्तय्के नं थी थी क्यान्सर ल्वय् अप्वःया वयाच्वंगु धासें आः ख्वप क्यासर अस्पतालय् थ्यंमथ्यं ६० म्ह क्यान्सर ल्वगि मस्त उपचारया निंतिं वयाच्वंगु दु धयादिल । वय्कलं अस्पतालं मन्त्रालयया नीतिकथं हे फुक्कं उपचार सितिकं बिइगु नं कनादिल ।

मस्तय् क्यान्सर ल्वय्या उपचार नापनापं क्यान्सरया उपचारया निंतिं माःगु ३५ थी वासः सितिकं बिइत्यंगु दु । स्वास्थ्य तथा जनसङ्ख्या मन्त्रालयं वंगु २०८० चैत १४ य् विश्व स्वास्थ्य सङ्गठन (डब्लुएचओ)नापं मस्तय्त जुइगु क्यान्सरया उपचारया निंतिं सितिकं वासः यायेगुया निंतिं सहलह याःगु खः ।

नेपाःया मुक्कं सीपिनिया ल्याः स्वय्बलय् निब्व स्वयां अप्वः ७१ गू प्रतिशतय् मपुनिगु ल्वय्या हुनिं खःसा उकि ११ गू प्रतिशत क्यान्सर ल्वय्या हुनिं सीगु इपिडिमियोलोजी तथा रोग नियन्त्रण महाशाखाया तथ्याङ्कय् न्ह्यथनातःगु दु ।

नेपालय् सन् २०२२ य् २२ द्वः क्यान्सर ल्वय्या न्हूपिं ल्वगित खनेदुगुलिइ १४ द्वः स्वयां अप्वः सीगु व दँय्पतिकं थ्यंमथ्यं १५ सः मस्तय्त क्यान्सर खनेदयाच्वंगु दु धाःगु दु ।