ख्वाउँयाः सगरमाथा लागा त्वतीपिं विदेशीत अप्वल

नयाँ विकल्प संवाददाता
प्रकाशित मिती: २०८१ मंसिर ११, १९: ३६

सोलुखुम्बु : हलिंया तज्जागु च्वापूगुँ सगरमाथा लागा त्वतीपिं विदेशी पर्यटकया ल्याः ७० प्रतिशतं अप्वःगु दु । चिकुगु अप्वयावगुलिं लिपांगु ई सगरमाथा लागाय् दुहाँ वनीपिंसिबें पिहांवनिपिनिगु ल्याः ७० प्रतिशतं अप्वःगु खः ।

लिपांगु ई छगू वाय् जहाजपाखें न्हय्सः व ११ म्ह पर्यटक लुक्ला कुहाँवःगु व निद्वः व प्यसः पर्यटकं सगरमाथा लागा त्वतूगु नेपाल नागरिक उड्डयन प्राधिकरण लुक्लां धाःगु दु ।

ज्याकुथिया ‘एटिसी अफिसर’ सञ्जय श्रेष्ठया कथं मंसिर ४ गते निसः व २३ म्ह दुहाँवःगु खःसा स्वसः व ६२ म्हेस्यां लुक्ला त्वतूगु खः । अथेहे ५ गते सच्छि व १९ म्ह दुहाँवःगु व स्वसः व २० म्हेस्यां लुक्ला त्वतूगु दु । ६ गते ८० म्ह दुहाँवःगु व स्वसः व ७४ म्ह विदेशी पर्यटकं जहाज गयाः लुक्ला त्वतूगु दु । अथेहे मंसिर ७ गते ८८ म्ह दुहाँवःगु व स्वसः व स्वम्ह पिहाँवंगु, ८ गते ५३ म्ह पर्यटक दुहाँवःगु व प्यसः व ८१ म्ह पिहाँवंगु, ९ गते सच्छि व ३६ म्ह दुहाँवःगु व स्वसः व स्वम्ह पिहाँवंगु व १० गते सच्छि व ३२ म्ह पर्यटक दुहाँवयालि निसः व ५७ म्ह लुक्लां पिहाँवंगु प्राधिकरणया ल्याः धलखय् दु ।

ख्वाउँगु तच्वकं अप्वयावःगुलिं विदेशी पर्यटक सगरमाथा लागा त्वता भ्रमण क्वपाला लिहाँवनेगु क्रम अप्वया वंगु पर्यटन व्यवसायी डिकबहादुर दर्नालं धयादिल । गुलिखे पर्यटक ला ख्वाउँ अप्वया च्वय्या लागा हे मवंसें लुक्ला नाम्चें हे लिहाँवनाच्वंगु नं वय्कलं कनादिल ।

दर्नालं धयादिल, “लःहे च्वापु जुयाब्यूगुलिं विदेशी पर्यटकत च्वय् वने हे मानेमजू । आ ख्वाउँ छक्वलं अप्वःगु दु, तन्हुया भ्रमणय् वःपिं थःगु भ्रमण क्वपाला लिहाँवनाच्वंगु दु ।” नाम्चेसिबें च्वय्या लागाय् कात्तिकया न्हापांगु ई निसें हे च्वापूगागुलिं थुगु लागाय् तसकं ख्वाउँगु वय्कःया अनुमान दु ।

लुक्लां लिहाँवइगु जहाजय् यात्रुत म्वःम्वः

“सिजन (पर्यटकीय मौसम) सिधयावंलिसें येँ व रामेछापं जहाजत खाली वइ अले थनं लिहाँवनीबले म्वःम्वः जुइ । तक्वःला टिकट हे काय् मफइगु जुयाच्वंगु दु, थुगु इलय् भ्रमण क्वपाला लिहाँवनीपिं विदेशीत अप्वः जूगुलिं यात्रुया चाप फये हे मफय्क अप्वयाच्वंगु दु,” प्राधिकरणया एटिसी अफिसर श्रेष्ठं राससयात कनादिल । वय्कःया कथं येँ व रामेछापया मन्थलीं कार्गाे ज्वनाः वःगु जहाजं लिहाँवनीबले पर्यटक ज्वनाः वनाच्वंगु दु ।

लुक्ला वइपिं पर्यटक थुगु इलय् तसकं म्ह्वः जूगुलिं जहाजतय्सं कार्गाे ज्वलं ज्वनाः वयाच्वंगु नागरिक उड्ययन प्राधिकरण लुक्लां धाःगु दु । अथेजुया हे लिहाँवनीबले विमानया टिकट कायेत तसकं थाकुयाच्वंगु पर्यटन व्यवसायीतय्सं धाःगु दु । लुक्ला वयेत टिकटया समस्या मजूसां थनं लिहाँवनेत टिकट कायेत प्यन्हू न्यान्हू न्ह्यवंनिसें बुकिङ यायेमाःगु बाध्यता दूगु पर्यटक गाइड पेम्बा शेर्पां धयादिल । विदेशी पर्यटकया चापया हुनिं नेपाःमितय्त टिकट कायेत तसकं थाकुयाच्वंगु वय्कलं धयादिल ।

लुक्लां येँया निंतिं विदेशी पर्यटकयात २९ द्वः व प्यसः व ८० तका व नेपाःमियात ११ द्वः हवाइ टिकटया भाः क्वछिनातःगु दु । विदेशीयाके काइगु भाः अप्वःगुलिं विमान कंपनीं विदेशीयात प्राथमिकता बियाच्वंगु स्वदेशी यात्रुतय् गुनासे दु । जहाजया टिकट काये थाकूगुलिं गुलि पर्यटकत ला न्यासिवनां जिल्ला सदरमुकाम सल्लेरी जुयाः अनं जीपं येँय् लिहाँवनेगु यानाच्वंगु दु ।

लुक्ला विमानस्थलं थौंकन्हय् सच्छिगु ल्याखँ जहाजं ब्वयेगु व जूवयेगु जुयाच्वंगु दु । निजी विमान कंपनीया तारा, सीता व समिट एयरलाइन्सं जक विमान ब्वयेका च्वंगु प्राधिकरणं धाःगु दु ।

लिहँंवनीपिं पर्यटक अप्वःगुलिं सुरक्षाय् च्वनीपिं नेपाल प्रहरी व पर्यटक प्रहरीयात नं तसकं लिमलाफमला जुयेमालाच्वंगु दु । थःगु लागाय् पर्यटकया सुरक्षा व लगत तयेगुलि अप्वः ई फ्याना च्वंनेमाःगु जिल्ला प्रहरी ज्याकुथिया प्रहरी नायब उपरीक्षक द्वारिकाप्रसाद घिमिरें कनादिल ।

“सिजनय् दुहाँवइपिं अप्वः, आः लिहाँवनीपिं विदेशी पर्यटकया चाप अप्वःया वगुलिं नेपाल प्रहरीयात व हे कथं उमिगु सुरक्षाय् छ्यला तयेमाःगु दु, पीप्यसः व १० मिटर हाकः दूगु दिङ्बोचेय् प्रहरी चौकी दु, अनया प्रहरीं सगरमाथा आधार शिविरतक गस्ती याइ”, प्रहरी नायब उपरीक्षक घिमिरें धयादिल । सगरमाथा लागाय् निगू सिजनयात मू पर्यटकीय ई कथं कायेगु याः । फागुन १५ निसें जेठ १५ गतेतक व असोज, कात्तिक व मंसिर मध्यतकयात मू पर्यटकीय सिजन कथं काइसा व बाहेकया ईयात ‘अफ सिजन’ कथं काइ ।

सगरमाथा लागा सगरमाथा राष्ट्रिय निकुञ्ज दुने लाः । थुगु लागायात विशेष याना हिमाल गयेगु, वन्यजन्तु स्वयेगु व साहसिक पर्यटनया निंतिं यक्वस्यां ल्ययेगु यानाच्वंगु निकुञ्जया प्रमुख संरक्षण अधिकृत सुष्मा रानां धयादिल ।

विसं २०३२ य् नीस्वंगु सगरमाथा राष्ट्रिय निकुञ्ज झिंछसः व ४८ वर्ग किलोमिटर लागाय् न्येनाच्वंगु दु । पूर्वी नेपाःया सोलुखुम्बु जिल्लाय् च्वंगु थुगु राष्ट्रिय निकुञ्जय् हलिंया तःजागु च्वापुगुँ सगरमाथालिसें खुद्वः मिटरसिबें तजाःगु ल्होत्से, नुप्से, चोयु, ल्होत्सेसार, पुमोरी, आमादब्लम्, थामसेर्कुलिसेंया च्वापुगँुत लानाच्वंगु दु ।

निकुञ्जदुनेया गोक्यो व व नाप स्वानाःच्वंगु पुखूयात सन् २००७ य् रामसार धलखय् दुथ्याकूगु खः । सन् १९७९ निसें निकुञ्जयात विश्वसम्पदा धलखय् लाकूगु दु । थुगु निकुञ्ज द्वःछि व च्यासः मिटरनिसें च्याद्वः च्यासः व ४८ मिटरतक तःजागु थासय् दु । थन कस्तुरी मृग, थार, घोरल, लङ्गुर माकः, मोनाल, हाँइटे, हर्न लार्क, टिबेटन स्नो कक, चुगलिसेंया झंगत दु ।

थ्व थाय् च्वापुगँु गइपिं व टे«किङया निंतिं जक मखसें सांस्कृतिक भ्रमणय् वइपिं द्वःलंद्वः पर्यटकयात सालाकायेत नं ताःलानाच्वंगु दु । तेङ्बोचे गुम्बालिसें थीथी धार्मिक थाय् नं दुगुलिं थुगु लागा पर्यटकतय् दथुइ लोकप्रिय जुइत ताःलानाच्वंगु दु ।