स्वास्थ्य बिमा सुधार यायेत गठित समितिं प्रतिवेदन लःल्हात

नयाँ विकल्प संवाददाता
प्रकाशित मिती: २०८१ पुष १९, १९: १९

येँ : स्वास्थ्य बिमा ख्यः सुधार यायेत गठित सुधार समितिं स्वास्थ्य नापं जनसङ्ख्यामन्त्री प्रदीप पौडेलयात प्रतिवेदन लःल्हाःगु दु ।

मन्त्रालय दुने ग्वसाःग्वःगु प्रतिवेदन लःल्हायेगु ज्याझ्वलय् स्वास्थ्यमन्त्री पौडेलं प्रतिवेदनं सुझाः ब्यूगु बुँदातय्त छ्यलाबुलाय् हयेगु प्रतिबद्धता यानादिल । वय्कलं धयादिल, “बिमा ख्यलय् सुधार यायेमाःगु यक्व दु । थुगु प्रतिवेदनं स्वास्थ्य बिमा सुधार यायेमाःगु योजना व विषयवस्तुत कःघाःगु दु । प्रतिवेदन अध्ययन यानाः उकियात लागू यायेगु जुइ ।”

वय्कलं आः दयाच्वंगु स्वास्थ्य बिमा ज्याझ्वः व्यवस्थित जुइ मफूगु व लक्षित पुचलं पूवंक लाभ कायेगु कथं सेवा काये मफूगु धयादिसें थुगु प्रतिवेदनं सुधार यायेत ग्वाहालि याइ धकाः धयादिल । वय्कलं प्रतिवेदन मन्त्रिपरिषदय् नं लःल्हाइगु व छुं ईलिपा सार्वजनिक याइगु खँ नं कनादिल ।

मन्त्रालयया सचिब हरिप्रसाद मैनालीं स्वास्थ्य बिमा सुधार यायेत न्ह्यब्वःगु प्रतिवेदन बांलाःगु कुतःया सुरुआत जुगु धयादिल । वय्कलं थथे धयादिल, “थ्व थी थी चरणय् विज्ञतलिसे सहलह यानाः दयेकूगु प्रतिवेदन खः । स्वास्थ्य बिमासम्बन्धी रणनीति प्रतिवेदनय् दुथ्याःगु दु । अध्ययन यानाः थुकिया कार्ययोजना दयेकेगु जुइ ।”

असोज ९ गते वरिष्ठ जनस्वास्थ्यविज्ञ डा शम्भुप्रसाद आचार्यया कजिसुइ मन्त्री पौडेलं स्वास्थ्य बिमा सुधार यायेत गुम्ह दुजःया समिति गठन यानादीगु खः । प्रतिवेदनया कजि आचार्यं थुगु प्रतिवेदनं स्वास्थ्य बिमा न्ह्यब्वया ह्वःताः व हाथ्यायात छुटे याःगु प्रतिक्रिया बियादिल ।

वय्कलं धयादिल, “स्वास्थ्य बिमा तःधंगु ज्याझ्वः खः । थुकिया प्रभावकारी सञ्चालनया निंतिं प्रतिवेदनय् आः थत्थें व भविष्यय् यायेमाःगु सुधारया कुतः कःघाःगु दु ।” वय्कलं स्वास्थ्य बीमा लागू जूगु जःलाखःला देय् व अन्तर्राष्ट्रिय स्वास्थ्य बिमा प्रणालीया अभ्यास अध्ययन यानाः सुझाःलिसेंया प्रतिवेदन दयेकूगु खँ कनादिल ।

समितिइ गण्डकी प्रदेशया नीति व योजना आयोगया पूर्वउपाध्यक्ष डा रघुराज काफ्ले, वरिष्ठ मुटु शल्यचिकित्सक प्रा डा भगवान् कोइरालालिसें अर्थ मन्त्रालय, श्रम रोजगार व सामाजिक सुरक्षा मन्त्रालय नापं राष्ट्रिय योजना आयोगया सहसचिव सदस्य खः । अथेहे स्वास्थ्य बिमा बोर्डया कार्यकारी निर्देशक, मन्त्रालयया गुणस्तर मापन नापं नियमन महाशाखाया प्रमुख व निजी ख्यःया प्रतिनिधितय्त समितिया दुजः दयेकूगु खः ।

सम्बन्धित समाचार

भारतीय दुतावासले लुम्बिनीमा मनायो बुद्ध जयन्ती

२०८१ पुष १९, १९: १९

लुम्बिनी : नेपालस्थित भारतीय दूतावासले लुम्बिनीमा बुद्ध जयन्ती मनाएको छ। लुम्बिनी विकास कोष र लुम्बिनी बौद्ध विश्वविद्यालयको सहकार्यमा कार्यक्रम सम्पन्न...

बुद्ध जयन्तीकै दिन भत्काइयो गुम्बा

२०८१ पुष १९, १९: १९

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...