मंकाः ब्यापार मञ्च मुँज्या : निगू पक्षया बनेज्या तब्याकेगुलि बः

नयाँ विकल्प संवाददाता
प्रकाशित मिती: २०८१ पुष २८, २०: १४

येँ : नेपाः–भारत मंकाः ब्यापार मञ्च (जेबीएफ) या निक्वःगु मुँज्या निगू पक्षया बनेज्या तब्याकेगु खँय् बः बिसें म्हिगः क्वचाःगु दु । निगू देय् दथुया आर्थिक व व्यावसायिक स्वापूयात अझं क्वातुकेगु तातुनाः जूगु उगु मुँज्याय् नेपाः व भारतया प्रतिनिधितय्सं ब्वति काःगु खः ।

ज्याझ्वलय् उद्योग, वाणिज्य लिसें आपूर्तिमन्त्री दामोदर भण्डारीं भारत नेपाःया दकसिबे तःधंगु बनेज्या साझेदार जूगु धयादिसें जेबीएफया मुँज्याय् जूगु सहमतियात निगूलिं पक्षं छ्यलाबुलाय् यंकेमाःगु धयादिल । वय्कलं निगुलिं देय् दथुइ आयात निर्यातय् खनेदयाच्वंगु पंगःयात ज्यंकेत अःपुइ कथं ज्या न्ह्याकेमाःगु धयादिल ।

उद्योग, वाणिज्य लिसें आपूर्ति मन्त्रालयया सचिव गोविन्दबहादुर कार्कीं मञ्चया मुँज्याय् न्ह्यःब्वगु विषययात व्यावहारिक छ्यलाबुलाय् हयेमाःगु धयादिल ।

नेपाः उद्योग वाणिज्य महासंघया नायः चन्द्रप्रसाद ढकालं नेपाः व भारत दथुइ आर्थिक लागाय् तःधंगु ह्वःता दूगु धयादिसें निगुलिं पक्षय् खनेदयाच्वंगु समस्यात चिकेत नीतिगत सुधार नापनापं व्यावहारिक समाधान मालाः न्ह्यचिलेमाःगु धयादिल । उगु ज्याझ्वलय् वय्कलं गैरभन्सारया समस्या चिइकेगु, नेपाःया वस्तु निर्यातय् ब्यूरो अफ इन्डियन स्ट्यान्डर्ड (बिआइएस) या प्रमाणीकरण प्रक्रियां खने दूगु समस्याया समाधानया निंतिं सहजीकरण यायेगु, भैरहवा व पोखरा विमानस्थलनापं भारतया सहरयात स्वायेगु व नेपाःया जलविद्युत् व मेमेगु निर्माणजन्य विकासया निंतिं माःगु विस्फोटक पदार्थया आपूर्ति सहज यायेमाःगु धयादिल ।

नायः ढकालं मुन्द्रा (गुजरात), धामरा (उडीसा) व जवाहरलाल नेहरू बन्दरगाह (मुम्बई) लिसेंया भारतया बन्दरगाहसं नेपाःया पहुँच तब्याकेगु खँ ल्ह्वनादीगु खः ।

नेपाः–भारत वाणिज्य सचिवस्तरीय मुँज्या हे ब्वःया कथं दूगु जेबीएफ मूज्याय् नेपाः व भारतया प्रतिनिधिं बनेज्या, लाय्, ऊर्जा, पर्यटन, कृषि, सुचं प्रविधि व पूर्वाधार विकासनापंया विषयस सहलह ब्याकूगु खः ।

मंकाः मुँज्याय् जलविद्युत् व नवीकरणीय ऊर्जा, सौर्य, वायुलिसेंया परियोजनाय् मंकाः ज्या यानाः स्वच्छ ऊर्जा प्रवद्र्धन, पर्यटन व कनेक्टिभिटी, सतक, रेल व हवाई स्वापू अप्वयेका सीमापार बनेज्या अःपुकेगु, बनेज्या व सीमापार लाय्, कृषि व वासः गुण दूगु वनस्पति, कृषि उत्पादनया कोटा चिइका बांलागु पुसा व प्रविधि बिइगु, वासः गुण दूगु वनस्पतिया अनुसन्धान व व्यावसायीकरणय् मंकाःज्या, डिजिटल प्रविधि व स्टार्टअप ग्वाहालिलिसेंया विषयस माःगु सहजीकरण यायेगु सहमति जूगु दु ।

मुँज्याय् जूगु सहमतिया विषययात शनिबाः हे नेपाः व भारतया वाणिज्य सचिवयात लःल्हाःगु दु । भारतीय वाणिज्य सचिव सुनिल बर्थवाल व नेपाःया वाणिज्य सचिव गोविन्दबहादुर कार्कीयात मञ्चया नकिं भवानी राणा व सन्थिल कुमारं उगु सहमति लःल्हानादीगु खः । भारतया वाणिज्य सचिव बर्थवालं जेबीएफय् ल्ह्वंगु एजेण्डा छ्यलाबुलाय् हयेया निंतिं थःगु पक्षपाखें माःगु पलाः न्ह्याकेगु बचं बियादिल ।

नेपाःया निंतिं भारतया राजदूत नवीन श्रीवास्तवं निगू देय् दथुया आर्थिक मुद्दाय् थ्व मुँज्या तसकं मू वंगु खँ न्ह्यथनादिसें थन पिहाँवःगु विषयस सहजीकरणया निंतिं थःगु पाखें पलाः न्ह्याकेगु धयादिल । उगु ज्याझ्वलय् मञ्चया (नेपाः) नकिं भवाणी राणां नेपाः–भारत दथुइ लाय् व बनेज्याया तःच्वःगु ह्वःता दूगु व थुकिं लबः कायेत माःगु सहजीकरण जुइमाःगु धयादिल ।

अथे हे भारतीय पक्षपाखें एन सुनिल कुमारं नेपाः–भारत दथुइ सतक, रेल व हवाई कनेक्टिभिटीइ सुधार जुयाच्वंगुलिं वइगु न्हि अझं अपुइगु धयादिल । मञ्चया मेगु मुँज्या भारतया न्हू दिल्लीइ यायेगु नं सहमति जूगु दु ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८१ पुष २८, २०: १४

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...