गण्डकीइ छगू लख १८ द्वः मचाल्यासेतय्त ‘एचपिभी’ खोप बिइगु

नयाँ विकल्प संवाददाता
प्रकाशित मिती: २०८१ पुष २९, २०: २६

गण्डकी : गण्डकी प्रदेशय् झिदँ निसें झिंप्यदँ तकया छगू लख झिंच्याद्वः न्हय्सः व ७४ म्ह मचाल्यासेतय्त मचाछेँया म्हुतुया क्यान्सरविरुद्धया ‘एचपिभी’ खोप बिइगु जूगु दु । खोप अभियानकथं प्रदेशया ११ गू हे जिल्लाय् क्वःछिनातःगु उमेर पुचःया मचाल्यासेतय्त वइगु माघ २२ गतेंनिसें फागुन ६ गतेतक खोप बिइगु जूगु खः ।

गण्डकी प्रदेश स्वास्थ्य निर्देशनालयया महानिर्देशक खिमबहादुर खड्कां खोप अभियान न्ह्याकेया निंतिं आः जिल्ला व स्थानीय तहलय् पूर्वतयारीया ज्या जुयाच्वंगु धयादिल । “खोप बिइपिं स्वास्थ्यकःमि नापनापं मेपिं सम्बन्धित मनूतय् निंतिं आः अभिमुखीकरण ज्याझ्वः न्ह्याकाच्वनाःगु दु”, वय्कलं धयादिल, “उगु खोप अभियानय् १० दँ निसें १४ दँतकया मचाल्यासेत त्वःमफिइमा धकाः आः जनस्तरय् प्रचारप्रसार व सचेतना ज्याझ्वः तकं यानाच्वनाःगु दु ।”

सङ्घ सरकारया स्वास्थ्य लिसें जनसंख्या मन्त्रालयपाखें ‘एचपिभी’ खोपयात राष्ट्रिय खोप धलखय् तयाः उगु खोपयात नियमित खोप सेवाया कथं बियेत तातुना खुगू निसें झिगू तगिंतकया ब्वनेकुथि ब्वनाच्वंपिं मिसामस्त व ब्वनेकुथि मवनीपिं झिदँनिसें झिंप्यदँ तकया मचाल्यासेतय्त थुगु खोप बिइत्यंगु खः । भविष्यय् मचाछेँया म्हुतुया क्यान्सर मजुइमाः धयाःगु आज्जु तयाः देय्न्यंकं ‘एचपिभी’ खोप अभियान न्ह्यायेत्यनाःगु महानिर्देशक खड्कां धयादिल ।

उगु अभियान पूवनेधुंका खुगू तगिंमय् ब्वनीपिं मिसामस्त व ब्वनेकुथि मवनिपिं झिदँया मचाल्यासेतय्ंत नियमित खोपकथं खोप बिइगु सरकारया नीति दूगु वय्कलं धयादिल । जिल्ला स्वास्थ्य ज्याकुथि, बाग्लुङया प्रमुख घनश्याम सापकोटां स्थानीय तहलय् दूगु स्वास्थ्यकःमितय्त खोप अभियान न्ह्याकेगु बारे निन्हूया अभिमुखीकरण तालिम बियेधुनाःगु धयादिल । वय्कःया कथं बागलुङय् ११ द्वः न्यासः व ५५ म्ह मचाल्यासेतय्त खोप बियेगु आज्जु दु ।

नेपालय् मचाछेँया म्हुतुया क्यान्सरया ल्वगि व सीपिनिगु ल्याः दँय्दसं तच्वयाः वंगुलिं उगु ल्वय् मजुइकेत खोप अभियानं योगदान याइगु प्रमुख सापकोटां धयादिल । धवलागिरि अस्पतालया मिसाल्वय् विशेषज्ञ डा विजय ओझां ‘एचपिभी’ खोपं मचाछेँया म्हुतुया क्यान्सर जुइगुयात ९८ प्रतिशतं म्हो याइ धयादिल ।

“मचाछेँया म्हुतुया क्यान्सर मजुइकेगु बांलाःगु उपाय धयाःगु थुकिया विरुद्धया खोप कायेगु खः”, वय्कलं धयादिल, “इलय् ल्वय् म्हसिकेगु व वासः यायेमफया मिसात सीमाःगु घटना मजुइमा धकाः उगु उमेर पुचःया फुक्कं मचाल्यासेतय्त तक खोप थ्यंकेमाःगु खः ।”

डा ओझाया कथं मचाछेँया म्हुतुया क्यान्सर नेपालय् मिस्तय्त दकसिबे अप्वः जुइगु क्यान्सरया धलखय् लाः । क्यान्सरया हुनिं मिसात सीगु ल्याखँ धाःसा मचाछेँया क्यान्सर न्हापांगु धलखय् लाःगु वय्कलं धयादिल ।

थ्व सिबे न्ह्यः सरकारं आव २०७२÷७३ व २०७३÷७४ सं नमूनाया कथं चितवन, कास्कीइ उगु खोप ज्याझ्वः न्ह्याकूगु खः । अथे हे वंगु आवय् ‘बाइभ्यालेण्ट एचभिपी सेकोलिन’ खोपया २० द्वः मात्रा न्यानाहयाः नमूनाया कथं न्हय्गू हे प्रदेशया छगू÷छगू अस्पतालं १४ दँया मचाल्यासेयात खुला पाक्क निगू मात्रा खोप ब्यूगु खः । उगु खोप अस्पतालयात खोप केन्द्र दयेका ब्यूगु खः । ‘ह्यूमन प्यापिलोमा’ भाइरसपाखें संक्रमित मनूया यौनाङ्गया छ्यंगु, ‘म्युकस मेम्बे्रन’ यौनाङ्गं पिहाँ वइगु तरल पदार्थनापंया सम्पर्क नं ल्वय् पुनीगु चिकित्सकतय्सं धाःगु दु ।

मनूतय् शरीरय् क्यान्सर जुइकीगु अप्वः जोखिम दूगु ‘एचपिभी’ भाइरसया तारंतार संक्रमण जुया नीदँ तक च्वंसा मचाछेँया म्हुतुया क्यान्सर जुइगु वय्कःपिनि धापू दु । नेपालय् दँय्दसं नीछसः व ६९ म्ह मिसातय्त मचाछेँया म्हुतुया क्यान्सर जुइगु व थुकिं दँय्दसं झिंस्वसः व १३ म्ह अथे धयाःगु न्हि प्यम्ह मिसापिं सिनाच्वंगु अनुमान यानातःगु दु ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८१ पुष २९, २०: २६

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...