छुं नं दल टुक्रा यायेगु व मिले यायेगु ज्या यायेमखु : प्रधानमन्त्री

नयाँ विकल्प संवाददाता
प्रकाशित मिती: २०८१ पुष २९, २०: २७

येँ : प्रधानमन्त्री केपी शर्मा ओलीं राजनीतिक दल ब्वथलासम्बन्धी कानुनयात भिंकेमाःगु आवश्यकता जुसां नं छुं नं दलयात टुक्रा यायेगु व मिले यायेगु ज्या थःगु मखु धकाः ध्वाथुइकादीगु दु ।

नेपाल पत्रकार महासङ्घया नवनिर्वाचित पदाधिकारीतय्त थौं प्रधानमन्त्री निवास, बालुवाटारय् लसं हनेगु व भिंतुना बिइगु झ्वलय् प्रधानमन्त्री ओलीं दल ब्वथलासम्बन्धी अध्यादेश हयेत्यंगु दु धकाः मखूगु व नकारात्मक खँ च्वयेकूगुलिं चिन्ता कयादिल । वय्कलं छुं नं दल मिले जुइगु व टुक्रा जुइगु उगु दलया आन्तरिक विषय जुगु धयादिल ।

वय्कलं वंगु इलय् थः प्रधानमन्त्री जूबलय् छुं नं दल ब्वथला जुइगु स्थिति वःसा संसदीय दल व केन्द्रीय कमिटी निगुलि नं ४० प्रतिशत थ्यंकेमाःगु संविधानया व्यवस्था छ्यलाबुलाय् जटिलता जुगुलिं संसदीय दल वा केन्द्रीय कमिटीइ ४० प्रतिशतया प्रबन्ध यानाः अध्यादेश हःसां नं विरोध वःबलय् उगु व्यवस्था लितकयागु धकाः धयादिल ।

उगु इलय् विरोध याःपिंसं हे लिपा २० प्रतिशत सांसदपाखें ब्वथले दइगु धइगु व्यवस्था यानाः दल टुक्रा याःगु लुमंकादिसें वय्कःपिंसं हे आः वयाः अध्यादेशया विरोध यानाच्वंगु वय्कःया धापू खः । तर थःगु धाःसा अथे यायेगु छुं बिचाः मदुगु खँ नं प्रधानमन्त्रीं कनादिल ।

प्रधानमन्त्री ओलीं मुलुक विकास व जनताया सेवायात ध्यानय् तयाः सरकारं राष्ट्रपतिन्ह्यःने थी थी अध्यादेश सिफारिस याःगु खँ कनादिल । वय्कलं उगु विषयकय् नेपाली कांग्रेसया सभापति शेरबहादुर देउवां विरोध याःगु धकाः मखूगु वक्तव्य च्वयेकूगु न्ह्यथनादिसें थजाःगु घटनापाखें नेपाःया पत्रकारिता बचे जुइमाःगुलिइ बः बियादिल । थजाःगु सुचं व बुखँया हुनिं जनताया सुचंया हकयात स्याइगु जुगुलिं लोकतन्त्रया दुरुपयोग जुइके मबिइत पत्रकार महासङ्घं भूमिका म्हितेमाःगुलिइ वय्कलं बः बियादिल ।

वय्कलं पिहाँ हे मवःगु अध्यादेशयात चांचां हे पिथन धकाः सम्प्रेषण याःगु न्ह्यथनादिसें मुलुक व जनताया पक्षय् थःपिंसं चांन्हि मधाःसे ज्या याना धकाः धयादिल । “जिपिं १०–५ या जागिर नयेत वइगु मखु । देय् व जनताप्रतिया जिम्मेबारी थुइकाः न्हिनय् वा चान्हय् ज्या जुइ । सुलाः व छलछाम यानाः ज्या यायेगु जिगु बानी मदु । देय्या भिं यायेत सकसिनं खंक ज्या यायेगु खः”, प्रधानमन्त्री ओलीं न्ह्यसः तयेगु कथं धयादिल, “भिंगु ज्या चान्हय् यायेमज्यू धइगु दु ला ?”

सरकारं थी थी नामं जुइगु कीर्ते व मखूगु ज्या दिकेत कानुन हयेत्यंगु सुचं बियादिसें प्रधानमन्त्री ओलीं पत्रकारतय्गु पेसागत सुरक्षा जुइमाःगु व उकिइ राज्यया भूमिका दइगुलिइ भलसा कयादिल ।

उगु झ्वलय् महासङ्घया नायः निर्मला शर्मालिसेंया पदाधिकारी व दुजःतय्त प्रधानमन्त्री ओलीं लसंहनादिल । महासङ्घया नायः शर्मा व महासचिव रामप्रसाद दाहालं प्रेस नापं अभिव्यक्ति स्वतन्त्रताया विषयकय् सरकारयात ध्यानाकर्षण यानादीगु खः ।

नायः शर्मां महासङ्घया निर्वाचन जुइत थी थी हुनिं लिबाःगु जुसां थुगुसी मिसाम्ह नायः जुयाः इतिहास तःगु न्ह्यथनादिसें थुकिइ राजनीतिक दल, पत्रकारिताया सङ्गठन व पत्रकारतय्गु नं साथ दु धकाः धयादिल ।

सम्बन्धित समाचार

बुद्ध जयन्तीकै दिन भत्काइयो गुम्बा

२०८१ पुष २९, २०: २७

काठमाडौं : खोला किनारका अव्यवस्थित बस्ती हटाउने सरकारी अभियानअन्तर्गत शुक्रबार बिहान बल्खु–टेकु आसपासका क्षेत्रमा डोजर चलाइएको छ । सोही क्रममा बल्खुस्थित साङ्गे...