एजेन्सी । प्रजातान्त्रिक गणतन्त्र कङ्गोको इक्वेटुर प्रान्तस्थित कङगो नदीमा डुङ्गा डुब्दा २८ जनाको मृत्यु भएकाे छ ।

अन्य २६१ जना बेपत्ता भएको  सरकारी संचारमाध्यमले जनाएका छन् ।

दुर्घटनास्थलको निरीक्षण गरेका डेपुटी प्रान्तीय गभर्नर टेलर एनगान्जीले भिडियो वक्तव्यजारी गर्दै भने, ‘गम्भीर अवस्था रहेको र दोषीहरूलाई कारबाहीका लागि कडाइका साथ निर्णय गरिने छ ।’

उक्त डुङ्गा कङ्गो नदीको बन्दरगाह शहर मबान्डाकाबाट शुक्रबार राति ३०० किलोमिटर दूरीकाे बोलोम्बाका लागि छुटेको थियो ।

अत्यधिक भारका कारण डुङ्गा पल्टिएको तर डुङ्गामा सवार यात्रुको सङ्ख्या कति थियाे भने कुरा अज्ञात रहेकाे प्रत्यक्षदर्शीले बताएका छन् ।

कङ्गो नदीमा अत्यधिक भार र डुङ्गाहरूको खराब अवस्थाले अधिकांश दुर्घटनाहरू  हुनेगरेको अधिकारी बताउंछन् ।