तिब्बतमा ७ म्याग्निच्युडको शक्तिशाली भूकम्प, १६ जनाको मृत्यु

नयाँ विकल्प संवाददाता
प्रकाशित मिती: २०८३ कार्तिक ७, ०७: ३१

काठमाडौं : चीनको तिब्बतस्थित पहाडी क्षेत्रमा ७ म्याग्निच्युडको शक्तिशाली भूकम्प जाँदा १६ जनाको मृत्यु भएको छ भने ३२ जना घाइते भएका छन् ।

चिनियाँ सरकारी सञ्चारमाध्यम सिन्ह्वाका अनुसार बिहीबार राति गएको भूकम्पको केन्द्रबिन्दु नागकु क्षेत्रको बाकेन काउन्टीमा रहेको थियो । उक्त क्षेत्र तिब्बतको राजधानी ल्हासाबाट करिब ४०० किलोमिटर उत्तरपूर्वमा पर्छ ।

भूकम्पपछि अधिकारीहरूले आपत्‌काल घोषणा गर्दै प्रभावित क्षेत्रमा उद्धार टोली परिचालन गरेका छन् । स्थानीय सञ्चारमाध्यमका अनुसार भूकम्पले ३३९ वटा घर भत्किएका छन् भने प्रभावित क्षेत्रमा विद्युत् आपूर्ति अवरुद्ध भएको छ ।

पहिरोका कारण क्षेत्रका सडकसमेत अवरुद्ध भएका छन् । यसले गर्दा उच्च भूभागमा रहेका प्रभावित क्षेत्रमा उद्धार टोली पुग्न कठिनाइ भइरहेको जनाइएको छ ।