मेलम्ची खानेपानीकाे ठेकेदार फरार प्रकरणः बैंक अफ काठमाण्डू र हिमालयन बैंकले डेढ अर्व बढीकाे मुद्दा जिते

नयाँ विकल्प
प्रकाशित मिती: २०७७ कार्तिक २१, १३: ३२

नयाँ विकल्प,
काठमाडाैं- नेपालका बैङ्किङ कम्पनी बैंक अफ काठमाण्डू र हिमालयन बैंकले चीनमा एक अर्ब ५६ करोड रूपैयाँको मुद्दा जितेका छन् ।

मेलम्ची खानेपानी परियोजनामा बैंक ग्यारेन्टी बसेबापत बैंक अफ काठमाण्डूको ९० करोड र हिमालयन बैंकको ६६ करोड रूपैयाँ गरी एक अर्ब ५६ करोड रुपैयाँ आठ वर्षदेखि फसेको थियो । बैंक अफ काठमाण्डू र हिमालयन बैंकले चीनको अदालतमा रकम फिर्ताका लागि मुद्दा जारी राखेका थिए ।

अन्तर्राष्ट्रिय ठेक्काको पेश्की र ग्यारेन्टी भुक्तानी सम्बन्धी मुद्दामा यी दुइ बैंककाे पक्षमा निर्णय भएकाे हाे । मेलम्ची खानेपानी परियोजनाको ठेक्का प्रकरणमा चाइना रेल्वे १५ ब्यूरो नामक चिनियाँ कन्स्ट्रकसन कम्पनीले फसाएको आराेप लगाइएकाे थियाे ।

०६५ चैतमा मेलम्ची आयोजनामा काम गर्न ठेक्का पाएको चिनियाँ ठेकदारका लागि दुइ बैंक काउन्टर ग्यारेन्टी बसेका थिए । चाइना रेल्वे १५ ब्युरोले चाइना कन्स्ट्रक्सन बैंक कर्पोरेसनबाट मेलम्ची खानेपानी आयोजनाको पर्फर्मेन्स ग्यारेन्टीको काउन्टर ल्याएको थियो ।

सुरुङमार्ग निर्माणमा ढिलाइ भएको भन्दै सरकारले ०६९ असोज ९ मा चाइना रेल्वेसँग ठेक्का तोडेपछ यी दुइ बैककाे ऋण नतिरि साे ठेकेदार कम्पनी भागेकाे थियाे ।