नेकपा फुटकाे रिहर्सल

ओलीको सहमति बिना नै प्रचण्डले बोलाए नेकपा सचिवालय बैठक

नयाँ विकल्प,

काठमाडौं – प्रधानमन्त्री तथा नेकपा अध्यक्ष केपी शर्मा ओलीले पार्टी सचिवालय बैठक बोलाउने सहमति नदिएपछि कार्यकारी अध्यक्ष पुष्पकमल दाहाल प्रचण्डले अहिले औपचारिक बैठक बोलाएका छन् ।

पार्टी केन्द्रीय कार्यालय धुमबाराहीमा अध्यक्ष दाहालले औपचारिक बैठक बोलाएका हुन् । अहिले ४ बजेका लागि अध्यक्ष दाहालले सचिवालयको औपचारिक बैठक बोलाएका हुन् ।

यसअघि प्रचण्डले ओलीकै सहमति बिना कात्तिक २० गते अनौपचारिक बैठक बोलाएका थिए । ओलीलाई सचिवालय बैठक बोलाउन बहुमत सचिवालय सदस्यले लिखित पत्र दिँदा समेत बैठक बोलाउन नमानेपछि प्रचण्डले आज बैठक बोलाएका हुन् ।

प्रचण्डले बोलाएको बैठकमा नेकपा बरिष्ठ नेताद्वय झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ उपस्थित छन् ।

यसअघि धुम्बाराहीमा बसेको अनौपचारिक बैठक अनुपस्थित भएका ओली खेमाका ईश्वर पोखरेल, बिष्णु पौडेल र रामबहादुर थापा बादल आजको बैठकमा आएनन ।

सचिवालयका बहुमत सदस्यको उपस्थितिमा बैठक हुनुअघि कार्यकारी अध्यक्ष प्रचण्डले प्रधानमन्त्रीसमेत रहेका अध्यक्ष ओलीलाई भेट्न प्रधानमन्त्रीको सरकारी निवास बालुवाटर गएका थिए । भेटमा प्रचण्डले सचिवालय बैठक बस्न लागेको जानकारी दिएका थिए ।