रौतहट घटनाका अभियुक्त मोहताव आलम पक्राउ

नयाँ विकल्प
प्रकाशित मिती: २०७७ मंसिर २२, १४: ३८

नयाँ विकल्प,

रौतहट । पूर्वमन्त्री तथा प्रतिनिधिसभाका सदस्य मोहम्द अफताव आलमका भाई मोहताब आलमलाई प्रहरीले पक्राउ गरेको छ ।

रौतहटको राजपुर बमकाण्डका आरोपित कांग्रेस सांसद अफतावका भाइ मोहताबलाई भारतीय प्रहरीसँगको समन्वयमा भारतको मोतिहारी जिल्लाबाट उनलाई पक्राउ गरीएको प्रहरीले जनाएको छ ।

२०६४ चैत २८ को संविधानसभा निर्वाचनको अघिल्लो दिन आलमका काका शेख इद्रिसको घरमा विष्फोट भएको र सो घटनामा घाइते भएका त्रिलोकप्रताप सिंह र ओसी अक्तरलाई जिउँदै ईंटाभट्टामा जलाएको प्रहरीको आरोप छ ।

५५ वर्षे मोहताबको निर्देशनमा घटना लुकाउने उद्देश्यले विस्फोटमा परी मृत्यु तथा घाइते भएका मानिसलाई ट्याक्टरमा राखेर इँटाभट्टामा जलाएको स्वीकार गरेको प्रहरीको दाबी छ ।

अफताब आलम गत वर्ष असोज २६ मा पक्राउ परेका थिए । तत्कालीन प्रहरी उपरिक्षक भुपेन्द्र खत्रीले उनलाई राजपुर फरहदवास्थित निजी निवासबाट पक्राउ गरेका थिए । आलम हाल नख्खु कारागारमा छन् ।