सर्वोच्च बारको नयाँ नेतृत्वको लागि मतदान सम्पन्न

नयाँ विकल्प
प्रकाशित मिती: २०७७ पुष ४, १६: ०६

नयाँ विकल्प,
काठमाडौं – सर्वोच्च अदालत बार एशोसिएसनको नयाँ कार्यसमितिको नेतृत्व चयनका लागि आज शनिबार मतदान सम्पन्न भएको छ ।

निर्वाचनमा प्रगतिशील, पेशागत, देशभक्त तथा समावेशी कानून व्यवसायी समूहको नेतृत्व वरिष्ठ अविधक्ता रविनारायण खनाल र वृहत लोकतान्त्रिक समावेशी (मधेशी, आदिवासी, जनजाति) पेशागत कानून व्यवसायी समूहको नेतृत्व वरिष्ठ अधिवक्ता पूर्णमान शाक्यले गरेका छन् ।

प्रमुख निर्वाचन अधिकृत राजु खड्काका अनुसार सर्वोच्च बारमा भौतिक दूरी कायम गरी मतदान सम्पन्न भएको थियो । मतदान प्रक्रिया दुई बजे सम्पन्न भएको थियो । कोभिडको संक्रमण भएको सदस्य भएमा २ः३० बजे लाइनमा नबसीकन सिधैँ मतदान गर्ने व्यवस्था गरिएको थियो ।

सर्वोच्च बारको सदस्यका हुनका लागि कम्तीमा १० वर्ष कानून व्यवसायीका रूपमा काम गरेको हुनुपर्दछ । सर्वोच्च अदालतबाट कम्तीमा सातवटा फैसला भएको व्यवस्था रहेको छ । उक्त बारमा सदस्य जम्मा ६०५ कानूनी व्यवसायी रहेका छन् । सर्वोच्च बारले मत माग्दै प्रचारप्रसारका सामग्री बाँड्ने काममा पनि प्रतिबन्ध लगाएको थियो ।