उपत्यकामा प्रचण्ड– माधव पक्षको विशाल प्रदर्शन

प्रचण्डको चेतावनी – अबको आन्दोलनले बालुवाटार र सिंहदरबार घेर्छ

• 

नयाँ बिकल्प,

काठमाडौं । नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले प्रतिगमन विरुद्धको अबको आन्दोलन प्रधानमन्त्रीको सरकारी निवास बालुवाटार र प्रशासनिक केन्द्र सिंहदरबार घेर्नमा केन्द्रीत हुने चेतावनी दिएका छन् ।

काठमाडौंमा प्रचण्ड माधव समूहले आयोजना गरेको विरोधसभालाई दाहालले भने, ‘सभा कस्तो हुन्छ ? ओलीजील भन्नु हुन्थ्यो, कस्तो भयो देख्नुभयो? विरोध कस्तो हुन्छ? हामी आज यहाँ साथीहरूको जानकारी अनुसार ५ लाख हाराहारी उपस्थित भएका छौँ।’

‘सर्वोच्च अदालतका न्यायधीहरूले पनि जनताले के चाहेका छन् भन्ने देखिसकेका छन्,जनताको शान्तिपूर्ण आन्दोलनको यो उपस्थितिले संविधान र जनताको पक्षमा निर्णय गर्न सहयोग पुग्छ’ दाहालले भने ।
‘सर्वोच्च अदालतको निर्णय जनताको पक्षमा आएन भने नेपालमा कसैले थेग्न नसक्ने आँधी हुरी आउँछ’ उनले भने, ‘ओलीको सनकको भरमा डराएर कसैले फैसला गर्दैनन् । जनताको आवाज नसुनेर ओलीको सनकलाई कसैलाई मान्दैनन् ।’

उनले प्रधानमन्त्री ओलीलाई ठगको अरोप लगाएका छन् । दाहलले जनतालाई ओलीले एकपछि अर्को मुद्दामा ठगेको आरोप लगाए । ‘केपी ओलीजस्तो ठग नेतालाई मैले दुई वर्षमा राम्रोसँग चिनेको छु । अहिले राम मन्दिरको नाममा जनतालाई ठगिरहेका छन्’, दाहालले भने ।

उनले आवश्यक परे जनताले बालुवाटार र सिंहदरबार पनि घेर्ने भन्दै केही दिनपछि सिंहदरबार घेर्न र बालुवाटार घेर्न लाखौंलाख जनता आउने र अर्को आमसभा आयोजना गर्ने चेतावनी दिए ।