कांग्रेस पदाधिकारी बैठक बुढानिलकण्ठमा, ५ दलिय गठबन्धनको बैठक सिंहदरबारमा बस्दै

नयाँ बिकल्प,

काठमाडौं – सर्वोच्च अदालतले प्रतिनिधिसभा पुनः स्थापना गर्न परामादेश जारी गर्दै गर्दा नेपाली कांग्रेसका सभापति सभापति शेरबहादुर देउवाले आफ्नै निवास बुढानिलकण्ठमा पार्टी पदाधिकारी बैठक बोलाएका छन्।

दिउँसो बोलाएको बैठकमा पार्टीको आगामी महाधिवेशनको तयारी र सर्वोच्च अदालतको फैसलापछिको अवस्थाको बारेमा छलफल भएको छ।
काँग्रेस महामन्त्री पूर्णबहादुर खड्काले पार्टीका नेताहरूसँगको आन्तरिक छलफलपछि देउवाले विपक्षी गठबन्धनका नेताहरूसँग छलफल गर्ने जनाए ।

सर्वोच्च अदालतले दुई दिनभित्र देउवालाई प्रधानमन्त्रीमा नियुक्त गर्न परमादेश दिएकाले नयाँ सरकार निर्माणका सन्दर्भमा समेत छलफल भइरहेको बुझिएको छ।

यसैबीच, आजै पाँच दलिय गठबन्धनका शीर्ष नेताहरुबीच सिंहदरबारमा छलफल हुने भएको छ। सर्वोच्च अदालतको संवैधानिक इजलासले प्रतिनिधिसभा विघटन गर्ने प्रधानमन्त्री केपी शर्मा ओलीको कदमलाई असंवैधानिक ठहर गर्दै प्रधानमन्त्री दाबी गरेका कांग्रेस सभापति देउवालाई प्रधानमन्त्रीमा नियुक्ति दिनु भन्ने आदेश दिएपछि गठबन्धनका नेताहरुबीच छलफल हुन लागेको हो।

बैठक साँझ ५ बजे सिंहदरबारस्थित कांग्रेस दलको कार्यालय सिंहदरबारमा बस्न लागेको हो। विपक्षी गठबन्धनमा नेपाली कांग्रेस, नेकपा माओवादी केन्द्र, नेकपा एमालेको माधव नेपाल समूह, जसपाको उपेन्द्र यादव समूह र राष्ट्रिय जनमोर्चा आबद्ध छन्।

पाँच दलिय गठबन्धनबाट प्रधानमन्त्रीमा प्रस्तावित देउवाले नेकपा माओबादी र जनता समाजबादी पार्टीलाई समाबेस गरी मन्त्रिमण्डल बनाउने विषयमा प्रारम्भिक छलफल हुने भएको छ।

संयुक्त सरकारमा राष्ट्रिय जनामोर्चाले नजाने स्पस्ट पारिसकेको छ भने एमालेको माधव नेपाल समूहको उपस्थिति सरकारमा हुन्छ वा हुँदैन भन्ने विषयमा पनि छलफल हुने भएको छ।