कायममुकायम प्रधानसेनापतिको जिम्मेवारी रथी प्रभुराम शर्मालाई

नयाँ विकल्प
प्रकाशित मिती: २०७८ श्रावण १२, १८: ४४

नयाँ बिकल्प,

काठमाडौं । सरकारले नेपाली सेनाका रथी प्रभुराम शर्मालाई कायममुकायम प्रधानसेनापतिको जिम्मेवारी दिने निर्णय गरेको छ । मन्त्रिपरिषद्को मंगलबारको बैठकले शर्मालाई कायममुकायम प्रधानसेनापतिको जिम्मेवारी दिने निर्णय गरेको हो।

शर्माले हाल सेनामा बलाध्यक्ष र बलाधिकृत रथीको जिम्मेवारी सम्हालिरहेका छन्। हालका प्रधानसेनापति पूर्णचन्द्र थापाले आगामी भदौ २५ गतेबाट तीन वर्षे सेवाअवधिका कारण अनिवार्य अवकाश पाउँदैछन्।

प्रधानसेनापतिले अवकाशको एक महीना अघि विदा बस्ने परम्परा भए पनि मन्त्रिपरिषद बैठकले प्रधानसेनापति थापा बिदामा बसेको दिनबाट शर्मालाई कायममुकायम प्रधानसेनापतिको जिम्मेवारी दिने निर्णय गरेको हो।

४३ औं प्रधानसेनापति पूर्णचन्द्र थापाले जेठ २३ मै पत्रकारसामू नेतृत्व हस्तान्तरणको प्रक्रिया सुरु भएको बताएका थिए।

नेपाली सेनाको ४४ औं प्रधानसेनापतिका रुपमा रथी प्रभुराम शर्माले नेतृत्व लिँदैछन् । युद्धकार्य महानिर्देशकको जिम्मेवारी सफलतापूर्वक पूरा गरेका शर्माले त्रिभुवन विश्वविद्यालयबाट इतिहासमा स्नातकोत्तर र भारतबाट नेशनल डिफेन्स कोर्स (एनडीसी) गरेका छन्।

भारत र अमेरिकामा उच्चशिक्षा एवम् सैन्य कला हासिल गरेका शर्मा नेपाली सेनाको इतिहासमा ब्राम्हण समुदायबाट प्रधानसेनापति हुने पहिलो शैन्यअधिकृत हुन्।