एमाले फुट्योः ३१ सांसद र ५८ केन्द्रिय सदस्य लिएर नेकपा एमाले समाजवादी पार्टी दर्ता

नयाँ विकल्प
प्रकाशित मिती: २०७८ भाद्र २, १८: ५७

नयाँ विकल्प ।

काठमाडौं । नेपाल कम्युनिस्ट पार्टी (एमाले) आज औपचारिक रुपमा फुटेको छ। एमाले वरिष्ठ नेता माधवकुमार नेपालको नेतृत्वमा नेतृत्वमा नेकपा एमाले (समाजवादी) पार्टी निर्वाचन आयोगमा दर्ता भएको छ।

नयाँ दर्ता गरिएको पार्टीको चुनाव चिन्ह खुल्ला किताब प्रस्ताव गरिएपछि अर्कै पार्टीसँग जुधेकाले हाललाई कुनै निर्णय भएको छैन।
नवगठित पार्टीको तर्फबाट नेता राजेन्द्र पाण्डेलगायत निर्वाचन आयोगमा पुगेर दल दर्ताका लागि निवेदन दिएका थिए। नयाँ पार्टीमा नेता नेपाल नै अध्यक्ष रहेका छन् भने झलनाथ खनाल वरिष्ठ नेता छन्।

नयाँ पार्टीमा ९५ जना केन्द्रीय सदस्य छन्। निर्वाचन आयोगमा दल दर्ताको निवेदन दिएपछि नयाँ पार्टीका नेता तथा गण्डकी प्रदेश सभा सदस्य राजेन्द्र पाण्डेले प्रतिनिधिसभा र राष्ट्रियसभाका ३१ जना सांसदहरु रहेको बताए। नेपाल पक्षमा एमालेबाट ५८ जना केन्द्रीय सदस्य उभिएका छन् । नयाँ दलमा ९५ जना केन्द्रिय सदस्य रहेका छन्।

नयाँ पार्टीलाई निर्वाचन आयोगले प्रमाणपत्र दिएपछि राष्ट्रिय सम्मेलन गर्ने र नयाँ क्रान्तिकारी पार्टीको रुपमा अघि बढाउने दल दर्तापछि नेता पाण्डेले पत्रकारलाई जानकारी दिए ।

बुधबार मात्रै राष्ट्रपति विद्यादेवी भण्डारीले राजनीतिक दलसम्बन्धी (दोस्रो संशोधन) अध्यादेश जारी गरेकी थिइन्। राष्ट्रपति कार्यालयले बुधबार जारी गरेको विज्ञप्तिमा संविधानको धारा ११४ को उपधारा १ बमोजिम राजनीतिक दलसम्बन्धी (दोस्रो संशोधन) अध्यादेश, २०७८ राष्ट्रपतिले जारी गरेको जनाइएकोछ।

अध्यादेशमा केन्द्रीय समिति वा संसदीय दलमा २० प्रतिशत संख्या पुर्याएर दल विभाजन गर्न सकिने व्यवस्था गरिएको छ।