जो रक्षक उही भक्षक:

निर्दोष पत्रकार फसाउन लागूऔषध हाल्ने दुई प्रहरी निलम्वन

नयाँ बिकल्प ।

काठमाडौं । रौतहटमा एक पत्रकारलाई फसाउन प्रहरीले नै मोटरसाइकलमा लागूऔषध राखेर पक्राउ गरिएको पुष्टि भएको छ।

क्लोज सर्किट क्यामरामा लागूऔषध राखिदिँदै गरेको देखिने भिडियो सार्वजनिक भएपछि जिल्ला प्रहरी कार्यालय रौतहटले घुमुवा प्रहरी सहायक निरीक्षक उदय यादव र प्रहरी जवान मनोज शाहले नातेदार धिरज यादवलाई प्रयोग गरेर पत्रकारको मोटरसाईकलमा लागूऔषध राखिदिएको पुष्टि भएको भन्दै उनीहरुलाई निलम्वन पनि गरेको छ।

रौतहट प्रहरीले ३२ साउनमा पत्रकार मोहम्मद मोजुबुल्लाहलाई लागूऔषध नाइट्राभेटसहित पक्राउ गरेको जनाएको थियो। हालै सार्वजनिक एक सीसी टीभी फुटेजमा लागूऔषध राखिदिएर पक्राउ गराइएको देखिएपछि अनुसन्धान थालिएको थियो।

अनुसन्धानबाट फरक तथ्य खुलेपछि यादवद्वयलाई पक्राउ गरिएको जिल्ला प्रहरी कार्यालय रौतहटले जनाएको छ। प्रहरीले आपराधिक षड्यन्त्र सम्बन्धी कसूरमा पक्राउ गरी धिरज यादवलाई ६ दिन म्याद थप गरिएको जनाएको छ। भने गैरव्यवसायिक काम गर्ने दुई प्रहरीलाई निलम्बन गरिएको छ।