नेपाली कांग्रेसको १४औं महाधिवेशनः

वडा अधिवेशन ७७ जिल्लामध्ये ३३ मा मात्र शुक्रबार शुरू

काठमाडौं । नेपाली कांग्रेस केन्द्रीय कार्यसमितिको निर्णय बमोजिम आज भदौ १८ गते ७७ जिल्लाका सबै ६हजार ७४३ वटा वडाको वडा अधिवेशन गर्ने कार्यतालिका भए पनि ३३ वटा जिल्लामा मात्र वडा अधिवेशन हुँदैछ।

काँग्रेसको केन्द्रीय निर्वाचन समितिका संयोजक महादेवप्रसाद यादवका अनुसार शुक्रवार ३३ वटा जिल्लाका वडाहरुमा मात्र अधिवेशन भएको छ। पार्टी सभापति शेरबहादुर देउवाले ७७ मध्ये ५६ जिल्लाका क्रियाशिल सदस्यको नाम स्वीकृत गरी निर्वाचन समितिलाई बुझाएका छन्।

निर्वाचन समितिले सभापति देउवाबाट प्राप्त ५६ जिल्लाका क्रियाशिल सदस्यहरुको नामावली सार्वजनिक गरिसकेको छ। पार्टीका पूर्वमहामन्त्री कृष्णप्रसाद सिटौला संयोजक रहेको समितिले २१ जिल्लाको सदस्यता विवादलाई समाधान गरी अझै बुझाई नसकेकाले ति जिल्लाको सदस्यता नै फाईनल भएको छैन्।

सिटौला संयोजकको कार्यदलमा केन्द्रीय सदस्यहरु डा. मिनेन्द्र रिजाल र रमेश लेखक सदस्य छन्। २१ जिल्लाको क्रियाशिल सदस्यता विबाद अन्त्य नभएकाले ति जिल्लाको अधिवेशन अनिश्चित भएको छ।

निर्वाचन समितिले २१ जिल्लाका क्रियाशिल सदस्यहरुको नामावली पार्टीबाट प्राप्त हुनासाथ पार्टीको वेबसाईटमा सार्वजनिक गर्ने भन्दै भदौ २६ गतेभित्रमा अनिवार्य रुपमा वडा अधिवेशन गर्नु पर्ने निर्णय सबै जिल्लामा पठाई सकेको छ। प्रदेश नंम्वर २ का आठ वटै जिल्लाको क्रियाशिल सदस्यता बिबाद अझै मिलेको छैन्।

क्रियाशिल सदस्यता फाईनल भईकसेका ५६ मध्ये २१ जिल्लाको मात्रै पूर्वनिर्धारित समयमा वडा अधिवेशन भएको छ। वाँकी ३५ जिल्लाका वडा अधिवेशन भने भदौ १९, २० र २१ गते सम्वन्धित जिल्ला कार्यसमितिको सहमतिमा जिल्ला निर्वाचन समितिले कार्यतालिका निर्धारण गरेका छन्।

काँग्रेस विधान अनुसार सबैभन्दा तलको संरचना नै वडा तह हो। वडा कार्यसमितिले नै टोल कार्यसमिति चयन गर्ने विधानमा व्यवस्था छ।
काँग्रेसले २३ भदौ भित्र वडा अधिवेशनमार्फत देशभर ६ हजार ७ सय ४३ वडामा नयाँ नेतृत्व स्थापित गर्ने छ। भदौ २७ गते भने गाउँ र नगरपालिकाको अधिवेशन गर्ने कार्यतालिका छ।

कांग्रेसको संशोधित विधान अनुसार क्षेत्रीय प्रतिनिधिले पालिकाको नेतृत्व चयन गर्नेछन् भने निर्वाचन क्षेत्र (प्रदेश र प्रतिनिधिसभा) समितिको चयनका लागि मतदाता हुनेछ। विधान अनुसार २०७६ फागुनमै हुनुपर्ने कांग्रेसको महाधिवेशन पाँच वर्ष ६ महिनापछि शुरु हुन लागेको हो। कांग्रेसको केन्द्रीय महाधिवेशन मंसिर ९ देखि १३ सम्म काठमाडौंमा हुनेछ।