संघीय संसदको दुबै सदनबाट बजेट पारितः राष्ट्रपतिले प्रमाणीकरण गरेपछि लागू हुने

नयाँ विकल्प
प्रकाशित मिती: २०७८ आश्विन ७, १५: ४९

काठमाडौ । प्रधानमन्त्री शेरबहादुर देउवा नेतृत्वको सरकारले ल्याएको विनियोजन बिधेयक २०७८लाई प्रतिष्थापन गर्ने विधेयक आज संघीय संसदको दुवै सदनबाट बहुमतबाट पारित भएको छ।

पूर्ववर्ती केपी शर्मा ओली नेतृत्वको सरकारले गत जेठ १५ गते अध्यादेशमार्फत ल्याएको बजेट संशोधन गर्दै अर्थमन्त्री जनार्दन शर्माले बजेटको लागि प्रतिस्थापन विधेयक सदनमा पेश गरेका थिए। बजेटसँग सम्वन्धित राष्ट्र ऋण उठाउने विधेयक र आर्थिक विधेयकलाई आज बिहीबार बसेको राष्ट्रियसभा बैठकले पारित गरेको थियो।

राष्ट्रियसभाबाट सुझावबिना नै पारित भएर आएको विधेयकलाई प्रतिनिधिसभामा पेश गरिएको थियो। अध्यादेशबाट ल्याएको बजेटलाई संघीय संसदको अधिवेशन शुरु भएको दुई महिनाभित्र पारित गर्नु पर्नेमा सरकारले तयारी नगर्दा भदौ ३१ गतेदेखि सरकारले संघीय सञ्चित कोषबाट खर्च गर्न पाएको थिएन।

राष्ट्रिय सभाको बैठकले बजेटसँग सम्वन्धित विधेयकहरु पारित गरेपछि मात्र आज प्रतिनिधि सभाको बैठक बसेको थियो। दुवै सदनले बजेट पारित गरेकाले अब राष्ट्रपतिबाट प्रमाणीकरण हुनासाथ खर्च अवरोध हट्नेछ। प्रतिनिधिसभाको कारबाही चालु हुँदा अघिल्ला बैठकमा जस्तै प्रमुख प्रतिपक्षी दल नेकपा एमालेका सांसदहरु सदनको कारबाही अबरोध गर्न रोष्टम घेरेर नाराबाजी गरेका थिए।