मन्त्रिपरिषद्लाई पूर्णता दिन मन्त्रालयको बाँडफाँट प्रस्तावमा सहमतिः भोली बिस्तार हुने

नयाँ विकल्प
प्रकाशित मिती: २०७८ आश्विन १९, १७: ५०

काठमाडौं । सत्तारूढ गठबन्धनका शीर्ष नेताबीच मन्त्रिपरिषद्लाई पूर्णता दिनको लागि मन्त्रालयको बाँडफाँटको प्रस्ताव टुंगिएको छ। प्रधानमन्त्रीको सरकारी निवास बालुवाटारमा आज बसेको सत्तारुढ पाँच दलका शीर्ष नेतासहितको बैठकले २१ मध्ये वाँकी १६ मन्त्रालय कुन कुन दललाई दिने भन्ने विषयमा लगभग सहमति भएको बालुवाटर स्रोतले जनायो।

प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल र जसपा अध्यक्ष उपेन्द्र यादवबीच भएको छलफलले १६ मन्त्रालयमा सहमति जनाएको हो। कांग्रेसले स्वास्थ्य तथा जनसंख्या, महिला वालवालिका तथा ज्येष्ठ नागरिक, श्रम रोजगार तथा सामाजिक सुरक्षा र संचार तथा सूचना प्रविधि मन्त्रालय कांग्रेसले लिने भएको छ।

यसअघि गृह,कानून र परराष्ट्र मन्त्रालयको नेतृत्व कांग्रेसले पाइसकेको छ भने स्वास्थ्यमा राज्यमन्त्री मात्र नियुक्त गरिएको छ। कांग्रेसको तर्फबाट बालकृष्ण खाँणले गृह, ज्ञानेन्द्रबहादुर कार्कीले कानून र डा. नारायण खड्काले परराष्ट्र मन्त्रालयको जिम्मेवारी पाइसकेका छन्।
कांग्रेसको भागमा यसअघि नै सात मन्त्रालय लिने सहमति भए पनि प्रधानमन्त्रीबाहेक मन्त्रिमण्डलमा आठ जना रहने सहमति भएको छ।

यस्तै नेकपा माओवादी केन्द्रले अब भूमि व्यवस्था सहकारी तथा गरिबी निवारण, खानेपानी, कृषि तथा पशुपंक्षी मन्त्रालय लिने सहमति भएको छ। उसले अर्थ र ऊर्जा, जलश्रोत तथा सिंचाई मन्त्रालयमा मन्त्री पठाइसकेको छ। माओबादीले सम्भवत एक राज्यमन्त्री राख्ने बारेमा छलफल भएको छ। तर पाँच मन्त्रालय दाबी गरिरहेकाे जनता समाबादीले चार मन्त्रालयमा चित्त बुझाए पनि एक राज्यमन्त्रीकाे दाबी छाडेकाे छैन।

बालुवाटार स्रोतका अनुसार बुधबारसम्म मन्त्रिपरिषदलाई पूर्णता दिने गरी तयारी गरिएको छ। गत असार २९ मा कांग्रेस सभापति देउवा प्रधानमन्त्री भएका थिए। अहिलेसम्म कांग्रेसबाट तीन मन्त्री र १ राज्यमन्त्री तथा माओवादी केन्द्रबाट २ मन्त्री मात्रै छन्।