बुटवलमा प्रहरी र सर्वसाधारणबिच झडप हुँदा चार जनाको ज्यान गयो

नयाँ विकल्प
प्रकाशित मिती: २०७८ आश्विन २४, २०: ३६

नयाँ विकल्प,
रुपन्देही – रुपन्देहीको बुटवलमा प्रहरीसँगको झडपमा परी चार जनाको ज्यान गएको छ ।

मोतीपुर औद्योगिक क्षेत्रमा आइतवार प्रहरीसँगको झडपमा परी घाइते भएकामध्ये चार जनाको ज्यान गएको हो ।

उपचारका लागि पाँच जना प्रहरीसहित १३ जनालाई पुुर्याएको थियो भने तीन जनाको अस्पताल आइपुग्दा नै ज्यान गइसकेको र थप एक जनाको उपचारका क्रममा ज्यान गएको युनिभर्सल मेडिकल कलेज भैरहवाका प्रशासन प्रमुख सुशील गुरुङले जानकारी दिए ।

ज्यान गुमाउनेमा सबै सर्वसाधारण रहेका छन् । ज्यान गुमाउनेमध्ये एक जना कपिलवस्तुको वाणगङ्गा नगरपालिका वडा नम्बर १० का ४८ वर्षका रमेश परियार रहेका छन् ।

अरुको भने पहिचान खुलेको छैन । पाँच जना प्रहरी र चार जना सर्वसाधारण गरी नौ जनाको उपचार भइरहेको छ। ज्यान गुमाएका चारै जनाको शव भैरहवा मेडिकल कलेजमा राखिएको छ ।

अतिक्रमित बस्ती हटाउन प्रशासनले बल प्रयोग गर्न खोज्दा स्थानीयवासी र प्रहरीबिच झडप हुँदा प्रहरीले गोली चलाएको थियो ।

प्रहरीले मृत्तकको नाम र ठेगाना खुलाएको छैन । जिल्ला प्रशासन कार्यालय रुपन्देहीले मोतीपुरमा कर्फ्यु आदेश जारी गरेको छ ।