सल्यान बस दुर्घटनामा १२ जनाको ज्यान गयो, १० को सनाखत (अपडेट)

नयाँ विकल्प
प्रकाशित मिती: २०७८ कार्तिक २१, १९: ४५

नयाँ विकल्प,

सल्यान – सल्यानमा यात्रुवाहक बस दुर्घटना हुँदा १२ जनाको मृत्यु भएको छ।

सल्यानको दुल्धारा पोखराबाट दाङको तुलसीपुरका लागि छुटेको रा १ ख २५५२ नम्बरको बस कपुरकोट गाउँपालिका ५ खारखोलामा आइतवार बिहान दुर्घटना भएको हो ।

दुर्घटनामा सल्यानको शारदा नगरपालिका १२ अहिले दाङको तुलसीपुर उपमहानगरपालिका ६ की ५३ वर्षीया प्रभा चलाउने, शारदा नगरपालिका २ की ६१ वर्षीया मीना डाँगी, शारदा ३ की ६६ वर्षीया लीला बुढाथोकी, त्रिवेणी गाउँपालिका १ काभ्राकी २४ वर्षीया मीना शाहीको मृत्यु भएको प्रहरीले जनाएको छ ।
दाङको बबई गाउँपालिका ४ की ६० वर्षीया डुली रेउले, बबई ६ की ७० वर्षीया कलावती बुढाथोकी, दाङको घोराही उपमहानगरपालिका नारायणपुरकी ६५ वर्षीया इन्द्रा अधिकारी, सल्यानको छत्रेश्वरी गाउँपालिका २ का २९ वर्षीय तिलक ओली, दाङ शान्तिनगर गाउँपालिका ८ की ३५ वर्षीया सावित्रा केसी र दाङ कोरवाङका पाँच वर्षीय सुरज ओली रहेको जिल्ला प्रहरी कार्यालयलेले जनाएको छ ।

बसमा ३७ जना सवार रहेको प्रहरीले अनुमान गरेको छ । घाइतेमध्ये १३ जनालाई थप उपचारका लागि हेलिकप्टरमार्फत नेपालगञ्ज रिफर गरिएको छ भने अन्य सबैको सल्यान जिल्ला अस्पतालमा उपचार भइरहेको छ ।

बसका चालक भने फरार भएका छन् । प्रहरीले उनको खोजी गरिरहेको छ । बस सडकबाट झन्डै दुई सय मिटर तल खसेको थियो ।