यातायात विभागको निर्णय रोक्ने को ?

नयाँ विकल्प
प्रकाशित मिती: २०७६ असार २, ०९: ०८

काठमाडौं । भौतिक पूर्वाधार तथा यातायात मन्त्रालय मातहतको यातायात ब्यवस्था विभागले गरेका हरेक जसो कार्यक्रम योजना र रणनीतिलाई मन्त्रीले नै भाँजो हालेर असफल बनाउन खोजेका छन् । यसको पछिल्लो उदाहरणको रुपमा विहीबार यातायात व्यवस्था विभागले गरेको निर्णयलाई लिन सकिन्छ ।

मन्त्रालयको कार्यभार सम्हालेदेखि नै मन्त्री रघुबीर महासेठका कारण विभागिय प्रमुखहरु पनि आजित भएका छन् । विभागले मन्त्रालयकै स्वीकृतिमा असार १ गतेदेखि उपत्यकामा रात्री सेवा बसहरु सञ्चालमा ल्याउने, काठमाडौं उपत्यकाको रिङरोड र भक्तपुर तथा कीर्तिपुरमा मालवाहक सवारीको आगमनमा रोक लगाउनेदेखि लिएर सार्वजनिक सवारी साधानमा १२ प्रतिशतसम्म भाडा बृद्धि गर्ने निर्णय गरेको थियो ।

विभागले विहीबार दिउँसो बैठक गरेर सोही निर्णय बमोजिम
साँझ यात्रुवाहक सवारी साधानमा भाडा १२ प्रतिशतका दरले बृद्धि गर्ने निर्णय गरेको १० मिनेट नबित्दै फिर्ता भएको छ । मन्त्री महासेठले यस्तो निर्णय कार्यबाहक प्रधानमन्त्री ईश्वर पोखरेलको निर्देशनमा निर्णय फिर्ता लिएको जनाएको छ ।

यातायात व्यवसायीहरुले मेसिनरी र पार्टपूर्जामा मुल्य बृद्धि भएको, जनशक्ति महंगो भएको र पेट्रोलिय पदार्थमा मुल्य बृद्धि भएको भन्दै मुल्यबृद्धिको तुलनामा सवारी भाडा पनि बृद्धि गर्न माग गर्दै आएका थिए ।