संक्रमितको संख्या २ सय १७ पुग्यो: लकडाउन कडा बनाउन प्रधानमन्त्रीको निर्देशन

नयाँ विकल्प
प्रकाशित मिती: २०७७ बैशाख ३०, २३: १५

काठमाडौं । विश्वव्यापी रुपमा फैलिएको कोभिड १९ को संक्रमण हुनेको संख्या नेपालमा २ सय १७ पुगेको छ ।
सोमबारसम्म कोरोना संक्रमितको संख्या एक सय ३४ थियो भने मंगलबार ८३ जना संक्रमितको संख्या बढेर दुई सय १७ पुगेको हो । स्वास्थ्य तथा जनसंख्या मन्त्रालयले मंगलबार राति सवा १० बजेसम्म उपलब्ध गराएको विवरणअनुसार पर्सा जिल्लामा मात्र कोरोना भाइरस संक्रमितको संख्या ५७ पुगेको छ । यसअघि पर्सामा २५ जना कोरोना भाइरसका संक्रमित फेला परेका थिए । पर्सा जिल्ला कोरोना संक्रमितको संख्या जम्मा ८२ पुगेको छ ।

मंगलबार कोरोना भाइरस संक्रमितहरु रुपन्देहीमा ९ जना, कपिलबस्तुमा ८ जना, महोत्तरी,धनुषा, भक्तपुरमा २-२ जना तथा काठमाडौं, सर्लाही र वारामा १-१ जना थपिएका थिए । पर्सापछि सबैभन्दा बढी कोरना संक्रमित उदयपुरमा देखिएका हुन् । त्यहाँ ३० जना संक्रमित भेटिएका थिए । संक्रमितमध्ये केही डिष्चार्ज भइसकेका छन् ।

हालसम्म कोरोना भाइरसबाट कपिलबस्तुमा २९ जना, वाँकेमा २४ जना, रुपन्देहीमा १६ जना, काठमाडौं र कैलालीमा ४-४ जना, रौतहट र वारामा ३-३ जना संक्रमित भेटिएका छन् ।
महोत्तरी, धनुषा, भक्तपुर, धादिङ, वागलुङ, चितवन, मोरङ र झापामा २÷२ जना कोरोना भाइरसका संक्रमित भेटिएका छन् भने सर्लाही, भोजपुर, वर्दिया र सप्तरी १ -१ जना कोरोना संक्रमित फेला परेका हुन् ।
स्वास्थ्य मन्त्रालयका अनुसार बीरगंजका ४ पत्रकारलाई पनि कोरोना संक्रमण भएको छ । रुपन्देहीमा संक्रमित एक महिला स्वास्थ्य संस्थामा कार्यरत नर्स भएको बुझिएको छ ।

मंगलबारसम्म सरकारले १८ हजार नौ सय ९० जनाको पीसीआर प्रविधिबाट र ५९ हजार छ सय २७ जनाको आरडीटी प्रविधिबाट कोभिड १९ को परिक्षण गरेको छ । १२ हजार सात सय ८५ जना क्वारेन्टाइनमा राखिएको छ भने दुई सय २८ जनालाई आइसोलेसनमा राखिएको छ ।
हालसम्म ३३ जना कोरोना भाइरसका संक्रमितहरु निको भएर स्वास्थ्य लाभ गरी घर फर्किसकेका छन् ।

मंगलबार दिउँसो १ बजे मन्त्रालयले जारी गरेको विज्ञप्तीमा काठमाडौंको टेकुस्थित प्रयोगशालामा गरिएको परिक्षणअनुसार ५७ जना संक्रमित थपिएको जनाएको थियो । जसअनुसार कपिलबस्तु जिल्लाका ८ जना, रुपन्देही जिल्लाका ९ जना, पर्साका ३९ जना र बारा जिल्लाका १ जनामा कोराना संक्रमण पुष्टी भएको जनाएको थियो ।

मंगलबार विहान १० स्वास्थ्य मन्त्रालयका सहप्रवक्ता समिरकुमार अधिकारीले जनाए अनुसार नयाँ पुष्टी भएको २६ जनाको राष्ट्यि जनस्वास्थ्य प्रयोगशाला टेकुमा गरिएको परिक्षण गर्दा कोरोना भाइरस पोजेटिभ देखिएको थियो । जसअनुसार पर्सा जिल्ला निवासी २२, २८, २८, ३२, ४५ र ६० वर्षिया ६ जना महिला र १६, २२, २४, २५, २५, २८, २८, ३२, ५९, ५५, ६१, ६१ वर्षीय १२ जना पुरुषहरुमा संक्रमण पुष्टी भएको हो ।

त्यस्तै, महोत्तरी जिल्ला निवासी १६ र ३५ वर्षीय पुरुषहरु, धनुषा जिल्ला निवाससी २० वर्षीय महिला र ४० वर्षीय पुरुष, भक्तपुर जिल्ला निवासी २५ वर्षीय महिला र २७ वर्षीय पुरुष, काठमाडौ जिल्ला निवासी ३३ वर्षीय महिला र सर्लाही निवासी ४५ वर्षीय पुरुषमा पनि कोरोना भाइरसको संक्रमण पुष्टी भएको छ ।

कोरोना भाइरस संक्रमितको संख्या मंगलबार एक्कासी ८३ जना थपिएर दुई १७ जना पुगेपछि प्रधानमन्त्री केपी शर्मा ओलीले मन्त्रिपरिषद्को बैठकमा लक डाउन खुकुलो पारेको भन्दै मन्त्रीहरुसँग असन्तुष्ट बनेका छन् । प्रधानमन्त्री ओलीको असन्तुष्टी पछि उपप्रधानमन्त्री इश्वर पोखरेल र गृहमन्त्री रामबहादुर थापा बादलले गृह सचिव र आइजीपीलाई कडा निर्देशन दिएपछि लकडाउन कडा बनाउन र काठमाडौं उपत्यका प्रवेश गर्ने मुख्य बिन्दुमा कडाइ गर्न निर्देशन दिएका छन् ।