कोरोना संक्रमित देखिएका ललितपुरमा १को निधन

नयाँ विकल्प
प्रकाशित मिती: २०७७ जेष्ठ १४, २३: १३

ललितपुर । ललितपुर महानगरपालिका वडा नं २२ बुङमतीका ५७ वर्षीय पुरुषको आज बुधबार साँझ मृत्यु भएको छ । इमाडोलस्थित किस्ट अस्पतालमा उपचार गराई रहेका ति पुरुषको मृत्यु भएसँगै नेपालमा कोरोना संक्रमणबाट मृत्यु हुनेको सख्या ५ पुगेको छ ।
जेठ ११ गते पाटन अस्पतालमा गएका ति ५७ वर्षे पुरुषलाई आसीयुमा राख्ने ठाउँ नभएका कारण किष्ट अस्पताल लगिएको थियो । उनको सोमबार जेठ १२ गते स्वाब परीक्षणका लागि पठाइएकोमा आज दिउँसो मृत्यु भएको थियो ।
उनको मृत्यु भएपछि आज साँझ मात्र परिक्षणको रिपोर्ट कोभिड पोजेटिभ आएको ललितपुरका जनस्वास्थ्य प्रमुख खगेश्वर गेलालले बताए । उनको स्वास्थ्य तथा जनसंख्या मन्त्रालयले भने मृत्युबारे पुष्टि गरेको छ ।
यसअघि वाँकेका २५ वर्षे पुरुष, सिन्धुपाल्चोककी २९ वर्षे महिला र बारा कलैयाका पुरुषको निधनपछि मात्र कोरोना संक्रमण पुष्टी भएको थियो । गुल्मी मदानेका पुरुषको भने रुपन्देहीको क्रिमसन अस्पतालमा उपचार हुँदै कोभिड १९ पोजेटिभ देखिएको थियो ।