डेंगीबाट भरतपुर महानगरका थप एक जनाको मृत्यु

नयाँ विकल्प संवाददाता
प्रकाशित मिती: २०८१ भाद्र १९, १४: ३५

भरतपुर। चितवनमा डेंगीको संक्रमणबाट थप एकजनाको मृत्यु भएको छ। मृत्यु हुनेमा भरतपुर महानगरपालिका–१८ चनौलिका ४१ वर्षीय पुरुष हुन्।

उनको उपचारका क्रममा भरतपुर अस्पतालमा मृत्यु भएको हो। ज्वरो आएर उपचारका लागि आएका उनको उपचारका क्रममा मृत्यु भएको हो।

शुक्रबार अस्पताल भर्ना भएका उनको मङ्गलबार मृत्यु भएको भरतपुर अस्पतालका वरिष्ठ फिजिसियन डा.कल्याण सापकोटाले जानकारी दिए।

उनका अनुसार बिरामीमा कडा खालको डेंगु देखिएको थियो। शरिरका विभिन्न भागबाट रक्तश्राव भई अंगहरुले काम गर्न छाडेर (मल्टि अर्गान फेलर) उनको मृत्यु भएको हो। उनको भेन्टिलेटरमा राखेर उपचार गरिएको थियो।

यसअघि शनिबार चितवन मेडिकल कलेजमा भरतपुर–२ का ६३ वर्षीय वृद्धको डेंगीको संक्रमणका कारण मृत्यु भएको थियो।

जिल्लाका विभिन्न अस्पतालमा उपचारका लागि आएका बिरामीमध्ये सात सय ८८ जनामा डेंगुको संक्रमण देखिएको छ।

तीन हजार तीन सय ३१ जनाको परीक्षणका क्रममा उनीहरुमा यो रोगको संक्रमण देखिएको हो । संक्रमितमध्ये पाँच सय ८० जना चितवनका र अन्य जिल्ला बाहिरका छन्।