नेपालगञ्ज मेडिकल कलेजले उपचारमा लापरबाही गरेको ठहरपछि क्षतिपूर्ति २६ लाख दिन आदेश

नयाँ विकल्प
प्रकाशित मिती: २०८१ भाद्र २७, १७: ५२

नेपालगञ्ज। उच्च अदालत तुलसीपुरको नेपालगञ्ज इजलासले नेपालगञ्ज मेडिकल कलेज शिक्षण अस्पतालले विरामीको उपचारमा लापरबाही गरेको ठहर गर्दै क्षतिपूर्ती भराउन आदेश दिएको छ।

उच्च अदालतले मृतक परिवारलाई २६ लाख १० हजार रुपैयाँ क्षतिपूर्ति दिलाउन बाँके जिल्ला अदालतले गरेको फैसला सदर गरेको हो।

उच्च अदालत तुलसीपुरको नेपालगञ्ज इजलासका वरिष्ठतम न्यायाधीश चन्द्रबहादुर सारु र गोविन्द जोशीको संयुक्त इजलासले जिल्ला अदालतकै फैसलालाई सदर गरेको हो।

नेपालगञ्ज उपमहानगरपालिका–२ घरबारीटोलका मनितलाल श्रेष्ठको उपचारमा अस्पतालले लापरबाही गरेका कारण बिरामीको मृत्यु भएको भन्दै मृतकका श्रीमती नम्रता श्रेष्ठले बाँके जिल्ला अदालतमा ०७६ साउन ३१ गते क्षतिपूर्ति मुद्दा दायर गरेकी थिइन्।

ज्वरो आएर अस्पतालको इमरजेन्सी वार्डमा लैँजादा बिरामीको उपचारमा हेलचेक्र्याइँ गरिएको, ओजिटी गर्न आएका सिकारू विद्यार्थीलाई उपचारमा संलग्न गराएको दाबीसहित उपभोक्ता संरक्षण ऐन २०७५ को दफा ५०, ५१ र ५२ अनुसार मृतकका परिवारले अस्पताल र उपचारमा लापरवाही गरेको भन्दै उपचार गर्ने भनिएका चिकित्सकका विरुद्धमा क्षतिपूर्तिको मुद्दा दायर गरेका थिए।

०७९ फागुन ११ गते बाँके जिल्ला अदालतमा मुद्दाको सुनुवाइ हुँदा नेपालगञ्ज मेडिकल कलेज शिक्षण अस्पताल नेपालगन्जबाट क्षतिपूर्ति दिलाउने आदेश गरेको थियो।