‘ओली नेतृत्वमा रहुन्जेल एमाले पतन हुने हो, जसलाई प्रधानमन्त्रीको कुर्सी मर्नेबेलासम्म चाहिएको छ’

दुई तिहाई नजिक भएको नेकपा फुटेर हाल तीन भागमा विभाजित भएको छ । तत्कालीन प्रधानमन्त्री केपी शर्मा ओलीले सरकारी निवासमा बसेर एक चालीस महिनासम्म गुट भेला गर्दै पार्टीका शिर्ष नेतादेखी ग्रासरुटका कार्यकर्ता समेतलाई काखापाखा लगाएका कारण पार्टीभित्र विग्रह सुरु भएको हो ।

तत्कालीन नेकपासँग एमाले र एमाओवादीको एकीकरणपछि दुई तिहाई नजिक पुगेको सरकारले पार्टीलाई एक ढिक्कामा राख्न सकेन । संविधान समेत मिच्ने काम गर्दै गएको भन्दै हाल एमाओवादी पार्टी आफ्नै पुरानो घर फर्केको छ भने एमाले समेत फुटेको अवस्था छ ।

एमालेबाट माधव कुमार नेपालको नेतृत्वमा एकतीस सांसद् र एक सय पन्ध्र जना केन्द्रीय सदस्यहरु मिलेर निर्वाचन आयोगमा नेकपा एर्ककृत समाजवादी नामक पार्टी दर्ताका लागी आदेश दिएका छन् । सोही समूहका प्रस्ट वक्ता एवम् सांसद् विरोध खतिवडासँग हाम्रा विशेष सम्वाददाताले गरेको कुराकानीको सम्पादीत अशंः

तपाइहरुले एमाले पार्टी फुटाएर नयाँ पार्टी बनाएर आउनुभयो अब सरकारमा चाही कहिले जानुहुन्छ ?
सरकारमा जाने भन्ने तपशिलका कुरा हुन् । पार्टी निर्माण, वामपन्थी आन्दोलनको संरक्षण, संविधान र गणतन्त्रको रक्षा यी हाम्रा प्रमुख मुद्दाहरु हुन् । त्यसकारण तपशिलका कुराहरुमा अहिले नै हाम्रो ध्यान केन्द्रीत भएको छैन । राजनीति बुझेको मान्छेले दलीय व्यवस्थापनमा विभिन्न उद्देश्यको लागी दलहरु खुलेका हुन्छन् ।

नेपाल कम्युनिष्ट पार्टी एमालेलाई सही ढंगले वर्तमान नेतृत्वले लैजान नसकेको हुनाले वामपन्थी आन्दोलन मात्रै होइन, भर्खरै हामीले निर्माण गरेको संविधान, गणतन्त्र र लोकतन्त्र रक्षाको लागी हाम्रो प्रमुख मुद्दामा ध्यान केन्द्रीत छ । अन्य बजारमा बहसमा क–कसले के–के भन्छन् ? दृष्टिकोण र सोंचाइ क–कसका साँघुरा र फराकिला छन् त्यो अनुसार तर्क वितर्क आउँछन् त्यस कुराको विवादमा गइरहनु आवश्यक छैन् ।

तर एमाले पार्टी अध्यक्ष केपी शर्मा ओलीले केही व्यक्ति चोइटिय केही फरक पर्दैन एमाले पार्टीलाई भनेर भन्नुभएको छ नि तपाई के भन्नुहुन्छ ?
केही फरक नपर्ने भए किन भनिरहेको त ? केही फरक पर्दैनथ्यो भने भनिरहनै पर्दैनथ्यो । यो त आत्तिएर अत्तालिएर उहाँले त्यस्तो भन्नुभएको हो ।

केही व्यक्तिको कुण्ठाको लागि हामीले बनाएको पार्टी नछोड्नुस भनेर केपी शर्मा ओलीले भन्नुभएको छ नि ?
ठिक भन्नुभयो, केही व्यक्तिको कुण्ठाको कारणले एमाले पार्टी ध्वस्त भयो केपी शर्मा ओली भन्ने नाम गरेको एकजना व्यक्तिको कारणले एमाले पार्टी ध्वस्त भयो ।

जसलाई प्रधानमन्त्रीको कुर्सी मर्ने बेलासम्म पनि चाहिने । बरु नेपाल कम्युनिष्ट पार्टी फुटोस् । एमाले फुटोस् तर आफु मलाई, म मेरो भन्ने चिन्तन जबसम्म उहाँसँग रहन्छ, तबसम्म त्यहाँबाट साथीहरु बाहिरिने र सही विचार, सही उद्देश्य बोकेको पार्टीमा सामेल हुने र त्यहाँ छोड्ने क्रमहरु अझ बढ्दै जान्छ ।

तर माधव कुमार नेपालसँग रहेका धेरै मान्छेहरुलेनै उहाँलाई साथ दिएनन् नि किन यहाँलाई के लाग्छ ?
मैले त उहाँहरु केपी शर्मा ओलीको साथमा रहेको पनि थाहा पाएको छैन । उहाँहरु केपी शर्मा ओलीसँग गएको र केपी शर्मा ओलीले राम्रो गर्नुभयो । त्यसैले हामी उहाँसँग हिँड्छौं भनेर उहाँहरुले बोलेको वक्तव्य दिएको मलाई थाहा छैन् ।

नेपालको कानुनअनुसार जति जना आवश्यक थियो हामीले त्यति जनाको दस्तखत लिएर निर्वाचन आयोग गएको हौं । त्यसकारण तपाईले नाम लिएका साथीहरु केपी शर्मा ओली भएको ठाउँ जानुभएको छैन ।

तर युवा नेताहरुको चौतर्फी दबाब छ नि माधव कुमार नेपाललाई निर्णय सच्याउनको लागि के निर्णय सकिएला त ?
जसले गल्ती ग¥यो उही ब्याक हुने हो नि । केपी शर्मा ओलीले गल्ती गर्नुभएको हो, उहाँ ब्याक हुनुपर्छ । गल्ती नभएको मान्छेको ब्याक हुनुपर्ने कारण के छ ? पार्टी माधव कुमार नेपालले होइन केपी शर्मा ओलीले फुटाएका हुन् ।

अब तपाइहरुको विकल्प के छ त केपी शर्मा ओलीसँग सम्झौता गर्ने कि गठबन्धन सरकारमा समावेश हुने ?
सरकार भन्दा ठुलो पार्टी र विचार हो । अहिले हाम्रो सरकारमा जाने भन्ने कुनै कुरा भएको छैन ।

माधव कुमार नेपाललाई मेरो साथ छ, उपप्रधानमन्त्री भएर म सरकारमा जान चाहन्छु भनेर वामदेव गौतमले भन्नुभएको छ नि तपाई के भन्नुहुन्छ ?
यो कुरा त उहाँले पहिलेदेखीनै भन्दै आइरहनु भएको छ । वामदेव गौतम मात्रै होइन केपी शर्मा ओलीसँग कोही पनि अडिएर बस्न सक्दैन । जबसम्म एमाले पार्टीमा केपी शर्मा ओलीको नेतृत्व रहन्छ, तबसम एमाले पार्टी पतनको ओरालो लाग्ने निश्चित छ ।

साराशंमा के बुझ्नुस् भने हनुमान बाहेक अरु कोही अडिन सक्दैन केपी शर्मा ओलीसँग । त्यो भन्दा बेगर पार्टीमा अरुको नेतृत्व पनि देखेका छैनन् ।

अरुको क्षमता पनि छैन भन्ठानेका छन् । त्यसैगरी उनीहरुलाई पढाइएको छ, घोकाइएको छ । एमाले जिन्दावाद भन्न कहिल्यै सिकाइएन । उनीहरुलाई केपी ओली जिन्दावाद भनेर मात्रै सिकाइयो ।

त्यही मितिबाट नै एमाले पार्टीको पतन सुरु भएको हो । जुन दिन पार्टी जिन्दावाद भन्न सिकाइएन र व्यक्ति जिन्दावाद भन्न सिकाइयो त्यही दिनदेखी पार्टीको पतन सुरु भयो ।

केपी शर्मा ओलीले सभामुखलाई भन्नुभएको छ नि छिटो भन्दा छिटो सूचना टाँसेर उहाँहरुलाई कारवाही गर्नुहोस् भनेर तपाई के भन्नुहुन्छ ?
केपी शर्मा ओलीले गर्नसक्नेनै त्यही हो । बनाउन निर्माण गर्न सक्ने नै होइन नि । सकुशल भएको पार्टी फुटाउने । नयाँ मान्छे प्रवेश गराउनुको सट्टा भएका पुराना संस्थापन कालदेखीका नेतालाई निकाल्ने, जनताका लोकप्रिय मान्छेहरु निकाल्ने ।

बारम्बार चुनाव हारेर एकचोटी जितेर आएका मान्छेलाई ७० करोड घोटाला सहित भ्रष्टहरुलाई मन्त्रालयको जिम्मा लगाउने जस्ता उहाँको चरित्रनै त्यही भएर त मैले पार्टी पतन हुन्छ भनेको ।

डन, गुण्डाहरु दायाँबाँया उहाँको हातमा हुने । अग्रीम पैसाको सर्त राखेर यो मन्त्रालय मलाई दे यति पैसा बुझाउँछु भन्ने खालका मान्छेहरु केपी शर्मा ओलीको मनपर्ने मान्छेको अग्रपंक्तिमा लिष्टको पहिलो नम्बरमा हुन्छन् ।

१४ लाई कार्वाही नभए महेश बस्नेतले अब सभामुखसँग मुठभेड हुन्छ भनेर भन्नुभएको कुरालाई यहाँले कसरी लिनुभएको छ ?
जब मान्छे प्रतिक्रियावादी खाडलमा जान्छ उसले नियम कानुन, संविधान व्यक्तिका सम्मान यी सबै कुरा बिर्सिएर पतनको बाटोतिर जान्छन् । दुईतिहाईको बहुमत आफ्नो पार्टीमा हुँदा जोगाउन नसक्ने । भएको सिंगो एमाले पार्टीलाई जोगाउन नसक्ने ।

पतन हुँदै, स्खलन हुँदै जाने र बिरामीले बर्बराएजस्तै कहिले केपी शर्मा ओली बर्बराँछन् भने कहिले केपी ओलीका हनुमानहरु बर्बराउँछन् । यसको कुनै तुक छैन । सबैभन्दा ठुलो भनेको सोंच र विचार हो ।

उद्देश्य हो, नेतृत्व हो । हामीले आन्दोलनबाट स्थापित गरेका के–के मान्यता छन् र संविधानले के–के कबुल गरेको छ ? कानुनी शासनमा हामी कति प्रतिबद्ध छौं ? भन्ने जस्ता कुरालेनै पार्टीको आउँदा दिनको भविष्य निर्धारण गर्छ ।

अरु क्षणिक आवेग, उत्तेजना जिन्दावाद, मुर्दावाद, आइएम विथ केपी ओली भन्न लगाएर जुलुस् निस्किएको हेर्न मात्र बाँकी छ । कदापी एमाले भनेको म हो र म भनेकै एमाले हो भन्न सुहाउँदैन । मेचीदेखी महाकालीसम्मको कार्यकर्ताको योगदानलाई उनीहरुले देखेकै छैनन् । यस्तै घमण्डले चुर भएका मान्छेहरुले बनिबनाऊ संस्थालाई पनि डुबाउँछन् ।

तपाईहरुको सांसद् पद धरापमा परेको छ नि के भन्नुहुन्छ ?
सांसद् पद ठुलो कुरै होइन । हामीहरु राजासँग लड्दै आएको, जीवन र मृत्युसँग लड्दै आएको, जेलनेल खाएर आएका हौं । त्यो मेहेनतको उसले सदुपयोग गर्छ कि दुरुपयोग गर्छ भन्ने कुरा हो । सांसद् भन्ने कुरा हामीले जनताको मतको कदर गर्दै जिम्मेवारी सम्हालेका हौं ।

निर्वाचन आयोगले माधव कुमार नेपाल र महन्थ ठाकुरको दल दर्ता दु्रतगतिमा अगाडि बढाउने भनेर भनेको छ । अझैपनि २÷४ दिन समय लाग्ने भयो, तर तपाईहरुलाई सरकारमा जान ढिलो हुने भयो नि ?
सरकारमा जाने कुरासँग सम्बन्ध नै छैन भनेर कति चोटी भन्नु म तपाईलाई ? निर्वाचन आयोगले आफ्नो विधिअनुसार समयमा दल दर्ता गरिदिनुप¥यो । हामी राष्ट्रव्यापी पार्टी निर्माणमा लाग्छौं । पार्टीलाई बैधानिकता दिन्छौं ।

विधानहरु पारित गर्छौ । राजनीतिक प्रतिवेदन पारित गर्छौ र नेतृत्व चयन गर्छौ त्यसपछि हामी राष्ट्रव्यापी रुपमा संगठन निर्माणमा लाग्छौं । अहिले भएको परिस्थितिको विषयमा एमाले पार्टी फुट्नुको कारण के ? एमाले क्रमश दक्षिणपन्थी धारमा कसरी गयो ?

केपी शर्मा ओलीको मुखको कुरा र व्यवहारका कुराहरु, राष्ट्रवादका कुराहरु केपी शर्मा ओलीको सरकारमा भएका भ्रष्टाचारका कुराहरु यी सबै कुराहरु हामीले जनताको माझमा लिएर जान्छौं । हाम्रो अहिले मुख्य चिन्ता र चासोको विषय त्यतातिर छ ।

माधव कुरामा नेपालको कारणले एकताको प्रयास सफल हुन सकेन भनेर केपी शर्मा ओलीले भन्नुभएको छ, नि तपाईलाई के लाग्छ ?
शुरुदेखी नै पार्टीलाई धरापमा पार्ने को हो उसले जिम्मेवार लिनुपर्छ । हामी केही पनि होइन भने आत्तिएको किन ? निकाल्न छोडिएको किन ? जनताले चुनेको संसद् पदहरु खाइदिन हतार भएको किन ?

८३ भोटमा खुम्चिएपछि पनि राष्ट्रिय पदलाइृ दुरुपयोग गरेर प्रधानमन्त्रीको कुर्सीमा टाँसिएर सत्ताको लालच गरेको किन ? पार्टी एकताको लागि आफुले गर्नुपर्ने त्याग गर्न नसकेको किन ? त्यसैगरी त्यस्ता लोभी पापीका कुराहरु खण्डन गर्नुपर्ने जरुरी पनि छैन् ।