जेसुकै भनून्, एमसीसी नेपालको हितमा छःप्रधानमन्त्री देउवा

नयाँ विकल्प
प्रकाशित मिती: २०७८ कार्तिक ३, ०८: ३३

काठमाडौं । सरकारलाई सर्वोच्च अदालतको परमादेश र जनादेश दुवै प्राप्त भएको प्रधानमन्त्री शेरबहादुर देउवाले बताएका छन् ।सञ्चारकर्मीसँग कुराकानी गर्दै नेपाली काँग्रेसका सभापति एवं प्रधानमन्त्री देउवाले प्रमुख प्रतिपक्षी दल एमालेले वर्तमान सरकारलाई ‘परमादेशबाट बनेको सरकार’ भनेर आलोचना गरिरहेका बेला यस्तो बताएका हुन् ।

केपी शर्मा ओली नेतृत्वको सरकारले गरेको संसद विघटनलाई सर्वोच्च अदालतले असंवैधानिक ठहर गर्दै विपक्षी गठबन्धनको तर्फबाट नयाँ सरकारमा दाबी प्रस्तुत गरेका देउवालाई प्रधानमन्त्री नियुक्त गर्न परमादेश जारी गरेपछि ओलीले सरकार छाड्नु परेको थियो । अत्तालिएर बालकोट पुगेका ओलीले परमादेश र जनादेश दुवै प्राप्त सरकारलाई त्येसो भन्न नहुने भन्दै देउवाले अदालतको गरिमामाथि आँच नपु¥याउन ओलीलाई आग्रह गरे ।

देउवाले भने, ‘सम्मानित सर्वोच्च अदालतले संविधानको व्याख्या गरेर मलाई प्रधानमन्त्री बनाउन परमादेश दिएको हो । यो सरकार परमादेशका साथै जनादेशबाट बनेको हो । मेरो नेतृत्वको सरकारलाई विश्वासको मत दिंदा १६५ सांसदको समर्थन प्राप्त भएको छ, सरकारलाई राम्रो बहुमत प्राप्त छ ।’

फरक प्रसंगमा प्रधानमन्त्री देउवाले अमेरिकी सहयोग परियोजना एमसीसी मुलुकको हितमा भएको बताएका छन् । यसमा अनावश्यक विवाद गर्न आवश्यक नभएको तर्क गरे । एमसीसी विकास अनुदान भएको दाबी गर्दै देउवाले भने, ‘एमसीसी नेपाललाई दिइएको ग्रान्ट हो, ब्याजमा होइन, ऋण होइन, केवल अनुदान मात्र हो । केही तत्व छन् नेपालमा, तिनले एमसीसीको नाममा बखेडा गर्न खोजेका छन् । त्यसैले एमसीसी विशुद्ध नेपालको हितमा छ, यो पास गर्न आवश्यक छ ।’