बैंकिङ कसुरमा निर्देशक शिशिर राणा पक्राउ

नयाँ विकल्प
प्रकाशित मिती: २०७८ असार २१, २३: १९

नयाँ विकल्प,

काठमाडौं – कलाकार तथा निर्देशक शिशिरशमशेर जबरा (शिशिर राणा) प्रहरीको फन्दामा परेका छन् । प्रहरीको केन्द्रीय अनुसन्धान ब्युरो (सीआईबी) को टोलीले राणालाई काठमाडौंको बिजुली बजारबाट पक्राउ गरेको हो ।

बैंकिङ कसुरमा फरार रहेका राणालाई सोमबार प्रहरीले पक्राउ गर्न सफल भएको सीआईबीका एसपी गंगा पन्तले जानकारी दिइन ।

राणालाई उच्च अदालत पाटनले २६ माघ २०७७ मा ४५ लाख जरिवाना र १० दिन कैद सजायको फैसला गरेको थियो । राणाले ललितपुरकै एक व्यक्तिबाट घर व्यवहार चलाउने भन्दै ४५ लाख ऋण लिएको सीआईबीले जनाएको छ ।

तर, रकम पर्याप्त नभएको नबिल बैंकको चेक दिएपछि उनीविरुद्ध बैंकिङ कसुरको उजुरी परेको थियो । सोही उजुरीका आधारमा उच्च अदालत पाटनले उनलाई दोषी ठहर गरेको हो ।

फिल्म क्षेत्रमा प्रोडक्सन म्यानेजरका रुपमा भित्रिएका राणा पछिल्लो समय कलाकार तथा निर्देशकको रुपमा परिचित रहेका छन् ।