बेपत्ता आरोही खोजिका लागि तालिम प्राप्त टोली परिचालित

नयाँ विकल्प संवाददाता
प्रकाशित मिती: २०७८ कार्तिक २२, १२: ५०

सोलुखुम्बु । सगरमाथा क्षेत्रमा पर्ने खाङतेगा हिमाल आरोहणका क्रममा बेपत्ता बनेका तीन जना फ्रान्सेली नागरिकको खोजिका लागि तालिम प्राप्त टोली खटेको छ । कूल ६ हजार ७८३ मिटर उचाइमा पर्ने खाङतेगा हिमाल आरोहणका क्रममा १३ दिनदेखि बेपता फ्रान्सेली नागरिकको खोजीका लागि तालिम प्राप्त टोली खेटेको हो ।

जिल्ला प्रहरी कार्यालय सोलुखुम्बुका प्रहरी निरीक्षक ऋषिराज ढकालका अनुसार तालिम प्राप्त १४ जना फ्रान्सेली नागरिकसहितको टोली आइतबार हेलिकोप्टरमार्फत खुम्बु आएको हो । मौसम प्रतिकुलताका कारण टोलीले आइतबार खोजी कार्य सुरु गर्न सकेन । आज (सोमबार, कार्तिक २२) टोलीले खोजी कार्यमा तीव्रता दिएको प्रहरी निरीक्षक ऋषिराज ढकाले जानकारी दिए ।

माउन्ट खाङतेगा हिमाल आरोहणका लागि असोज १८ गते आठजनाको टोली होलिडे हिमालय ट्रेक्स एण्ड एक्सपीडिसन प्रालिमार्फत लुक्ला आएका थिए । तीमध्य थोमस, गाब्रियल र लुइस नाम गरेका फ्रान्सेली नागरिक बेपत्ता भएका हुन् ।