रोहितको शतकमा नेपालद्वारा युएईलाई २३४ रनको लक्ष्य

नयाँ विकल्प
प्रकाशित मिती: २०८२ कार्तिक १३, १६: ३७

काठमाडौं।आईसीसी विश्वकप लिग-२ अन्तर्गत जारी युएईविरुद्धको खेलमा नेपालका कप्तान रोहित पौडेलको शतकीय इनिङ्समा नेपालले युएईलाई २ सय ३३ रनको लक्ष्य प्रस्तुत गरेको छ।नेपालले निर्धारित ५० ओभरमा अलआउट हुँदै २ सय ३३ रनको स्कोर तयार गर्‍यो।
नेपालका लागि कप्तान रोहितले १०९ रनको शतकीय इनिङ्स खेले। तेस्रो नम्बरमा ब्याटिङका लागि आएका रोहितले १३० बलमा ५ चौका र २ छक्काको सहयोगमा १०९ रन बनाएको अवस्थामा जाहिद अलीको बलमा अर्यान्स शर्माद्वारा क्याचआउट भएका थिए। उनको यो एकदिवसीय अन्तर्राष्ट्रियमा दोस्रो शतक हो।

टस जितेर पहिले ब्याटिङ गरेको नेपालका लागि रोहितबाहेक आसिफ शेखले ३५ रन बनाउँदा आरिफ शेखले २७ रन बनाए। त्यस्तै, दिपेन्द्र सिंह ऐरीले २३ रन बनाएका थिए। त्यस्तै, करण केसीले १३ रन बनाए। युएईका लागि जुनिक सिद्धिकीले ३ विकेट लिँदा जाहिद अलीले ४ विकेट हात पारे। त्यस्तै, मुहम्मद रोहिद, हाइदर अली र ध्रुव परासरले १-१ विकेट लिए।