सरकार ! बामदेवजस्तै विश्वास दिलाउन कुलमानले कस्तो परीक्षा दिनुपर्ने ?

नयाँ विकल्प,
काठमाडौं – आवधिक निर्वाचनबाट चुनिएका प्रतिनिधिले शासन गर्न पाउने लोकतन्त्रमा विधिकै पालना गरिन्छ तर, यही विधिलाई देखाएर लोकतन्त्रको चीरहरण गरिन्छ भन्ने उदाहरण एक सातामा सरकारले गरेका निर्णयले गतिलो उदाहरण देखाएको छ ।

सत्तारुढ दल नेकपाको आधिकारिक अभिव्यक्ति दिने प्रवक्ता नारायणकाजी श्रेष्ठले ‘उर्जा क्षेत्रमा कुलमान घिसिङले दिएको योगदानलाई नेपाली जनताले कहिल्यौ बिसर्ने छैनन् र नेपाल आमाका सुयोग्य सुपुत्र उनी प्राधिकरणमा पनुर्नियक्ति हुने’ बताए । तर, उनको यो सूचना झुट सावित भयो ।

भदौ १८ गते ४ वर्षे कार्यकाल सकिएका प्राधिकरणका कार्यकारी निर्देशक घिसिङलाई भदौ २९ को मन्त्रिपरिषद् बैठकले पनुर्नियुक्तिको निर्णय गर्ने विश्वासलाई लत्याउँदै प्रधानमन्त्री ओलीले प्रकृया नपुर्याइ नियुक्ति दिन नसक्ने भन्दै विधिको अत्तो थापे । प्रधानमन्त्री तथा मुलुकको कार्यकारी यो निकायको नियतको सर्बत्र आलोचना भएको छ ।

कुलमानलाई विधि नपुर्याइ प्राधिकरणमा नल्याउने तर्क गरेको सरकारले विहीबार मात्र बर्दिया क्षेत्र नं १ बाट कांग्रेसका संजय गौतमसँग पराजित बामदेव गौतमलाई ६ महिनादेखि खाली रहेको राष्ट्रिय सभा सदस्यमा मनोनित गरेर लोकतन्त्रको चीरहरण गरिएको छ ।

प्राधिकरणको कार्यकारी निर्देशक भएपछि देशबाट लोडसेडिङ हटाउन योगदान दिएका कुलामानलाई नेपाली नागरिक जनजनले जय जयकार गरिरहँदा सरकारले विधि र प्रक्रिया पुर्याउनु पर्ने अत्तो थापेको प्रति नेपाली कांग्रेसका युवा नेता प्रदिप पौडेलले समेत गम्भिर आपत्ति जनाएका छन् ।

सामाजिक सञ्जाल ट्विटरमा ट्विट गर्दै पौडेलले नेपाल विद्युत प्राधिकरणमा कुलमान घिसिङ पुनर्नियुक्तिको माग स्वभाविक भए पनि उनले कुन परिक्षा दिनु पर्ने हो ? प्रश्न गरेका छन् ।

‘हामी कुलमानको कामलाई सम्मान गर्छौ, उदारणिय कार्य गर्ने जो कोहीलाई जनताले पूनः नियुक्ति माग गर्नु स्वभाविक छ ।यति काम गर्दा पनि सरकार उनलाई प्रतिस्पर्धाको परिक्षा लिन आग्रह गर्दैछ’, पौडेलले ट्विटम प्रश्न गरे, ‘सरकार ! वामदेव कुन नतिजा लिएर विराजमान भए ?’

जनताले पराजित गरेका र नपत्याएका गौतमलाई सांसद बनाउने सरकारले जनताले सडकम उत्रिएर कुलामानलाई प्राधिकरणको कार्यकारी निर्देशकमा ल्याउन गरेको आवाजलाई लक्षित गर्दै नेता पौडेलले भने, ‘बामदेवले जस्तै विश्वास दिलाउन कुलमानले कस्तो परिक्षा दिनुपर्ने ?’