प्रदेश ५ काे स्थायी राजधानी विवादः

रुपन्देहीकाे पूर्व –पश्चिम राजमार्गमा प्रदर्शनकारी प्रहरीमाथि नै चेक जाँच गर्दै

नयाँ विकल्प,
बुटबल – कानून विपरितका कार्य, अबान्छित क्रियाकलाप वा अशान्ति फैलाउन सक्ने अवस्थामा शान्ति सुरक्षा कायम गर्न समान्यतय नेपाल प्रहरीले सार्वजनिक सडकमा सवारी साधन रोकेरै यात्रु वा सडक प्रयोगकर्ताको चेक जाँच गर्ने गर्छन् ।

तर, प्रदेश नंम्वर ५ को सरकारले प्रदेशको अस्थायी राजधानी बुटबल रहेकोमा स्थायी राजधानी दाङको भालुवाङमा सार्ने निर्णय गर्दै प्रदेश सभामा प्रस्ताव पेश गरेपछि रुपन्देहीमा आन्दोलनकारीहरुले बाटो छेकेर उल्टै सुरक्षाकर्मीको चेक जाँच गरेका छन् ।

प्रदेशको राजधानी दाङमा सार्ने प्रदेश ५ को सरकारको निर्णयका बिरुद्ध विशेष गरी बुटवल उपमहानगरपालिका क्षेत्र र रुपन्देहीका हरेकजसो स्थानमा आन्दोलनकारीले सडक अबरोध गरी सर्वसाधरणलाई आवत जावतमै रोक लगाएका छन् ।

पूर्व – पिश्चिम राजमार्गकाे रुपन्देहीस्थित देवदह नगरपालिका प्रवेश गर्ने कचहरा पुलमा आइतबार प्रदर्शनकारीहरुले महिला प्रहरी सुरक्षाकर्मी सवार स्कुटर रोकेरै चेक जाँच गरेका छन् ।

हातमा लठ्ठी लिएका युवाहरुले अत्यावश्यक सेवाको लागि यात्रा गरेका र सुरक्षाकर्मीलाई समेत प्रदर्शनकारीले चेक चाँज गरी परिचय पत्र हेरेर मात्र हिँड्न दिएका छन् । आइतबार मध्यान्ह देवदह क्षेत्रमा प्रदर्शनकारीले दुई महिला प्रहरीको परिचय पत्र चेक गरेर मात्र स्कुटर चलाउन बाटो छोडिदिए ।

प्रदर्शनकारीहरुले बैंकका कर्मचारीलाई बाटोबाटै फर्काएका छन् भने सरकारी कर्मचारीलाई भाटो उज्याउँदै बाटोबाट फर्काइ दिएका छन् ।