हिंसा रोक्न सामाजिक सञ्जाल प्रतिबन्धित

नयाँ विकल्प
प्रकाशित मिती: २०७४ फाल्गुन २८, ०९: ००

श्रीलंका । श्रीलंकाको सञ्चार विभागले फेसबुक, भाइबर, वाट्सएप जस्ता सामाजिक सञ्जाललाई थप हिंसा रोक्न भन्दै देशभर बन्द गराउने निर्णय गरेको छ । मुलुकमा अनावश्यक विवाद र हिंसा भड्किनबाट जोगाउन यस्तो निर्णय सेवा प्रदान गर्ने श्रींलकाले जनाएको छ । श्रींलकाको सरकारले गत साता सेवा प्रदान गर्ने कम्पनीहरुलाई सामाजिक सञ्जालका नेटवर्कहरु तत्कालै बन्द गर्न लगाएको हो ।

वास्तवमा फेसबुकमार्फत केही व्यक्तिले मुसल्मानमाथि हमला गर्ने योजना बनाइरहेको देखिएपछि सरकार उक्त निर्णय लिन बाध्य भएको जनाइएको छ । सञ्चार विभागका प्रमुखले फेसबुक, भाइबर र वाट्सएप ७२ घण्टाका लागि बन्द गराइनेबारे सम्पूर्ण प्रयोगकर्तालाई जानकारी गराएको बताए ।

मंगलबार मात्र सरकारले मुसलमान र बौद्ध धर्मीबीच तनाव बढ्दै गएपछि थप समस्या उत्पन्न हुन नदिन १० दिनसम्म संकटकाल लागु गर्ने घोषणा गरेको थियो । केन्डी शहरबाट सुरु भएको झगडापछि बौद्ध धर्म मान्ने मानिसले मुसलमानको व्यवसाय र मस्जिदमा आगो लगाइदिँदा मंगलबार एक मुसलमान युवकको मृत्यु समेत भएको थियो ।