फोरमसँगको सम्बन्ध चिसिँदै – Naya Bikalpa
November 19, 2026, Thursday      Epaper

फोरमसँगको सम्बन्ध चिसिँदै

समर्थन फिर्ता लिने मुडमा राजपा

काठमाडौ । संघीय समाजवादी फोरमले शुक्रबार सत्तारोहण गरेसँगै राष्ट्रिय जनता पार्टी नेपालले सरकारलाई दिएको समर्थन फिर्ता लिने मुड बनाएको छ । आफूहरुलाई सत्ताबाट अलग्याएर फोरमलाई सत्तामा पुर्याउने ओली सरकारको रणनीतिबाट राजपाका अध्यक्ष महन्थ ठाकुरदेखि राजेन्द्र महतो समेत रुष्ट भएका छन् । जुन घटना पछि फोरम र राजपाको सम्वन्ध समेत विग्रने भएको छ ।

प्रदेश २ का आठ जिल्लामा गठबन्धन बनाएर प्रतिनिधिसभा तथा प्रदेशसभा निर्वाचनमा गएका यी दुई दलबीच फोरम सरकारमा गएसँगै तिक्तता छाएको हो । मंसिरमा भएको निर्वाचनमा राजपा र फोरमको गठबन्धनमा राम्रै नतिजा आयो । प्रदेश २ को नतिजाबाटै फोरम र राजपा राष्ट्रिय दल बनेका थिए । अहिले संघीय संसदमा राजपा तेस्रो र फोरम चौँथो दलको हैसियतमा छन् ।

प्रदेश २ मा पनि फोरम र राजपा गठबन्धनको सरकार छ । फोरमबाट निर्वाचित लालबाबु राउत प्रदेश २ को मुख्यमन्त्री भएका छन् । प्रदेशमा फोरम राजपाभन्दा ठूलो दल भएको छ । फोरम सरकारमा गएसँगै प्रदेश २ को समीकरण परिवर्तन हुने हो कि भन्ने विभिन्न अड्कलबाजी हुन थालेका छन् ।

एक साताअघि मात्र प्रदेश २ सरकारलाई दिएको समर्थन नेकपाले फिर्ता लिनु र त्यसको भोलिपल्ट फोरमले नेकपा नेतृत्वमा रहेको केन्द्रीय सरकारमा जाने सहमति गर्नु निकै रहस्यपूर्ण बनेको फोरम नेताहरू बताउँछन् । अंकगणितका हिसाबले पनि प्रदेश २ मा फोरम र नेकपाको बहुमत पुग्छ । अहिले राजपा सरकारमा हुँदा पनि फोरमसँग स्पष्ट बहुमत छ । फोरमबाट २९, राजपाबाट २५ र एक स्वतन्त्र सांसद गरी ५५ जनाको समर्थनमा प्रदेश २ को सरकार छ ।

राजपा सरकारबाट बाहिरिने र नेकपा सरकारमा जाने हो भने फोरम र नेकपाको ६२ जना सांसद हुने छन्, ३२ जना नेकपा सांसद रहेका छन् । यसले गर्दा केन्द्रमा जे समीकरण छ त्यही हुन सक्ने भन्दै राजपाका नेताहरू हच्किएका छन् । राजपाका कतिपय नेताहरूले प्रदेश २ को सरकारबाट बारिहनु पर्ने र केन्द्र सरकारलाई दिएको समर्थन फिर्ता लिनुपर्ने भन्दै नेतृत्वलाई दबाब दिन थालेका छन् । यस्तै, राजपाभित्रकै कतिपय नेताहरूले आफ्ना माग पूरा गराउन भए पनि सरकारमा जानुपर्ने र सत्तारुढ दललाई बिच्क्याउन नहुने बताउँदै आएका छन् । राजपाले फोरम सरकारमा गएर आफूहरूलाई धोका दिएको बताउँदै आएको छ ।

गठबन्धन गरेर अघि बढेको फोरम माग पूरा नहुँदै सरकारमा गएर गल्ती गरेको राजपाका नेताहरुको ठहर छ । सहकार्य गरेसँगै संघर्ष गर्दै चुनावमा पनि सँगै प्रतिस्पर्धा गरेको दललले धोका दिएको भन्दै राजपाले अव मधेसका जनतालाई साथमा लिने योजना बनाएको छ ।
सरकारलाई दिएको समर्थन फिर्ता लगायतको बिषयमा राजपाको २५ गतेको राजनीतिक समितिको बैठकबाट सबै निर्णय हुने बताएको छ । प्रदेश सरकारबाट बाहिरिने र केन्द्र सरकारलाई दिएको समर्थन फिर्ता लिने पक्षमा राजपाका नेताहरु रहेका छन् । आन्दोलनका समयमा मधेसी जनतालाई अधिकारका कुरा गरेर सडकमा ल्याउने र सत्ता पाएपछि अलपत्र छाड्ने काम फोरमले गरेको राजपाका नेताहरुले आरोप लगाउन थालेका छन् ।

राजपाले संविधान संशोधन, मधेश आन्दोलनका क्रममा मृत्यु भएकालाई शहीद घोषणा गर्नुपर्ने र घाइतेको उपचार गर्नुपर्ने मुख्य माग सरकारले पुरा नगरेको भन्दै आन्दोलनको तयारी समेत गर्ने मुड बनाएका छन् ।

सम्बन्धित समाचार

निर्वाचनमा एमालेको पराजय अस्थायी हो : विद्यादेवी भण्डारी
निर्वाचनमा एमालेको पराजय अस्थायी हो : विद्यादेवी भण्डारी
  • २०७५ जेष्ठ २१, ०९: ३०

काठमाडौं । नेकपा एमालेकी वरिष्ठ नेता तथा पूर्वराष्ट्रपति विद्यादेवी भण्डारीले गत फागुन २१ गते सम्पन्न निर्वाचनमा पार्टीले व्यहोरेको पराजय अस्थायी...

जसपा नेपालका १८ जनप्रतिनिधिको पद रिक्त
जसपा नेपालका १८ जनप्रतिनिधिको पद रिक्त
  • २०७५ जेष्ठ २१, ०९: ३०

काठमाडौं । निर्वाचन आयोगले जनता समाजवादी पार्टी (जसपा) नेपालबाट स्थानीय तह निर्वाचन २०७९ मा निर्वाचित १८ जना जनप्रतिनिधिको पद स्वतः...

राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
राष्ट्रपति पौडेलद्वारा काठमाडौं–तराई द्रुतमार्गको महादेवटार सुरुङ ‘ब्रेक थ्रु’
  • २०७५ जेष्ठ २१, ०९: ३०

काठमाडौँ । राष्ट्रपति रामचन्द्र पौडेलले राष्ट्रिय गौरवको आयोजना काठमाडौं–तराई/मधेश द्रुतमार्गअन्तर्गत मकवानपुरस्थित महादेवटार सुरुङको बुधबार ‘ब्रेक थ्रु’ गरेका छन् । ३...